劇集《鐵探》出街後，中港兩地的口碑相當不錯，特別是劇集找來好幾位電影界的演員加盟，令整體的「戲味」加重之餘，也為電視前的觀眾帶來新鮮感。姜皓文（黑仔）入行33年，在亞視出身，今次首次參演無綫播出的劇集，劇中飾演警方的臥底Bingo游秉高，面對警方的Madam Man（惠英紅飾）和越南黑幫大佬營長（吳廷燁飾），站在兩邊不是人的局面，除了增添劇集的緊張氣氛外，黑仔的演繹為他帶來很多掌聲，特別是他跟患腦退化症媽媽（盧宛茵飾）在監倉對望崩潰嚎哭的一幕，令所有觀眾動容。
睇片請Click：
黑仔在《鐵探》演臥底Bingo大受歡迎。（《晴報》圖片）
《鐵探》中，Bingo亦正亦邪，至今仍未知道是否變節。(網上圖片)
「入屋」力量強大
黑仔接受《晴報》專訪，他直言拍攝完畢就預期反應會好，但沒想到反應是意料之外的更加好，他說：「我好耐好耐冇試過被小朋友邀請我影合照，有時有啲中、小學生走埋嚟同我影相，感覺好神奇，我唔知入屋個效應係咁勁，佢哋見到我戴口罩，仲搞笑話你第一集咪戴口罩，我哋認得出你呀。」黑仔表示當時只是認識盧宛茵短短兩日時間，但跟對方聊天已經感受到媽媽那份窩心的感覺，而自己有一個同樣患腦退化症的婆婆，特別感觸良多，黑仔說：「我同媽咪相處時間好少，我由婆婆帶大，當年我入寄宿學校讀書，同婆婆分開一段時間，畢業之後又唔知點搵返佢，有次睇港台節目介紹老人院，我見到我婆婆，即係搵返佢，但當時佢已經有腦退化症，間中認得，間中又唔記得我，所以拍攝嗰陣都幾觸動我。」
在《鐵探》中，Bingo跟媽媽盧宛茵對看爆喊，令不少人動容。（圖片：《鐵探》電視截圖)
黑仔在劇中跟袁偉豪由敵對變合作。(圖片：姜皓文IG)
黑仔首次拍攝無綫劇集。(圖片：姜皓文IG)
「亞視出身，必屬佳品」
近年不少亞視出身的人在無綫發展順利，更被觀眾形容「亞視出身，必屬佳品」，總是覺得亞視浸過的，演技一定是非常好，黑仔說：「係咩？亞視人咁叻咩？會唔會係亞視冇咁多機會畀佢哋發揮，一有機會就衝破小宇宙呢？當然，部分藝人『撈味』好重，唔會畀心機去做事，可能留喺同一間公司太耐，冇晒火，我哋亞視人過到去就有新鮮感，爆發力勁，可能餓戲餓太耐。」
黑仔1986年參加亞洲電視舉辦的第一屆「電視先生選舉」贏得亞軍而入行，從而開啟他演藝之路，由小角色開始做起，足足打拼了27年時間，他說：「我在亞視期間不覺得係捱，因為早期都係抱住玩票心態去做，餐搵餐食，無咩人生目標，直到好後期先識點樣調整人生方向，亞視時代真係浪費好多時間，錯失好多好好嘅機會，所以趁我依家年紀未太大仲做到，我想追返晒返嚟，因為之前錯失太多。」黑仔形容當年未決定演戲是終生事業，根本不知道甚麼時候該發力前進，他說：「當年有些監製唔想用我，脾氣唔好、戲唔好、唔夠專注呢一行......因為以前真係為搵食之嘛，曾經2003年期間發現自己冇咩嘢做，我就去同朋友夾份開私房菜，做小生意，但仍然會深深不忿，心野周圍打電話問有咩角色啱我做，後來決定都係專注留守呢一行好好發展。」
黑仔直言在亞視太心散，浪費好多機會和時間。（《晴報》圖片）
在亞視浸淫多年，演技慢慢得到進步和認可。(電視截圖)
機會來了好好把握
離開亞視後他主力在電影圈發展，黑仔難忘前輩谷峰向他提點的一句說話，他說：「谷爺同我講『小子，堅持一下，排隊梗會輪到你。』，直至到依家我都袋住佢呢句說話，做咩都好，一定要堅持，那怕會放低一陣，但千祈唔好放棄，離開咗呢行就咩都冇。」 近年，黑仔在電影圈密密接工作，目的是為了追回失去的機會，希望在演藝界繼續好好發展所長，今年他憑電影《翠絲》首次入圍香港電影金像獎最佳男主角，可惜不敵黃秋生而撲空，但黑仔對演出非常滿意，他說：「《翠絲》至今對我仍然留有餘悸，當時老闆古天樂問我想演咩，叫我試試扮女人，我覺得自己對跨性別人士完全唔識，一定做不來，後來公司安排我同跨性別人士傾偈，了解佢哋內心世界，李敏又一直同我傾，希望了解咩叫做女人心，過程好辛苦又繁複，你依家要我再演，我都未必演到。」雖然失落金像獎，但黑仔沒有質疑電影的成功，他說：「電影有9項提名，我覺得全部都係實至名歸，因為套戲辛苦，個戲好難演，比任何角色都難演，當然，金像獎好視乎評審個心態同好多唔同嘅因素，但我覺得我係應該會攞，如果個獎畀我，我係值得擁有。好多人笑我成日都陪跑，你試吓陪跑吖，同咁大班影帝大師兄一齊角逐，已經好好運。」黑仔笑言好多人形容他在演藝界標尾會成功，但他自覺距離成功還有一大距離，希望繼續努力，得到工作上的滿足感。
拍攝《翠絲》時經歷多次的心理轉換，黑仔認為金像獎如果得獎都是應得的。（《晴報》圖片）
黑仔今次衝擊男主角未能成功，但相信很快會再有機會問鼎影帝寶座。（圖片：姜皓文IG)
黑仔在電影《翠絲》入面有破格的演出。(圖片：姜皓文IG)
服裝： 速寫@JNBY
髮型： Jove Shek@La Môd Salon
化妝： Herrylaiming Make-Up
場地：All In Burger & Bar (大坑新村街4A-7號新村樓地下B號舖)