「一子錯，滿盤皆落索」，黃心穎偷嗒許志安被全城追擊，形象盡毁。本身備受無綫力捧嘅黃心穎即時被掟入雪櫃，連帶佢之前拍落嘅所有劇集及綜藝節目都全數被抽起或停播，所有商演、登台一律換人。
黃心穎屬無綫台慶重頭劇《法證先鋒IV》第三女主角，劇集監製梅小青日前承認劇集將會重拍：「好多謝公司（TVB）喺金錢、人力、物力嘅支持，一班演員都好好，啱啱出事未決定點樣做嘅時候，佢哋已經WhatsApp同我講，會支持我嘅一切決定，當決定重拍要度期嘅時候，佢哋即刻應承。」她續稱內地方面亦非常支持該劇，曾向她提出多個補救方案，當中包括用電腦特技將黃心穎「換臉」，她說：「聽到呢個方法都有小小詫異，最終都係覺得重拍係最好嘅。」當中包括台灣的七日外景，台前幕後再開工，台灣連香港共五十組戲，加上要再次租借電影拍攝器材，損失超過一千萬元！
監製梅小青曾稱讚黃心穎笑容好自然，睇好佢會係下個鍾嘉欣，話畀佢做一啲好sweet嘅角色，都唔會討厭佢，覺得佢好可愛、好自然，愈睇愈鍾意，《法證先鋒IV》小青姐仲特登都加強佢戲份，今次真係跌晒眼鏡！
左起：黃心穎、鮑起靜、梅小青與黃浩然
曾考慮電腦特技「換臉」
至於重拍原因是該劇已跟內地簽合約，將於11月在中、港兩地同步播映，在內地播劇需要取得批文，由於有關方面一直嚴打形象負面藝人，故演員若涉桃色醜聞，獲批機會近乎零，故無綫決定重拍。在劇中飾演網絡記者的心穎屬第三女主角，受影響的部分達三分之一，因補拍需時，劇組已第一時間跟受影響的藝人黃浩然、李施嬅及譚俊彥等聯繫，幸眾人相當理解並即時作出配合，大隊預計下月可以開工。
李施嬅變最快「回巢」演員
劇中主角李施嬅，坦言會配合重拍：「一定會做好成件事，套劇拍得好辛苦，之前啲Fans都話，我喺告別無綫之作冇得播唔開心，所以都想播到。（啲期有冇影響？）其實拍攝檔期仲未定，自己喺出面都已經接咗一啲工作，不過會盡量配合。」談到已離開無綫，今次再拍，是否以新酬勞再接？她笑言：「吓！我都冇諗過呢個問題，不過如果6月拍，我諗我係離巢後最快回歸嘅演員囉！」談到受心穎事件拖累，會否不開心？她說：「又唔可以咁講，都係一件咁唔如意嘅事，唔好睇番以前，要向前望，大家點樣會令成件事做得更好。」
至於譚俊彥則表示呢段時間放緊假休息，對佢其他工作影響唔大，唯一係7月開嘅音樂會，會少咗練歌嘅時間。
其他節目去向
心穎主演的無綫劇《堅離地愛堅離地》、《牛下女高音》等播映無期，慘變倉底貨，牽涉藝員甚廣，最黑仔係喺兩套劇首次擔正做男一嘅張振朗淪為倉底貨主角！（相關新聞：http://bit.ly/2vxQVoo（【牛下禁播】安心偷食中佬當災！吳岱融望觀眾支持「心血」重見天日））另外，黎諾懿主持嘅《懿想得到》節目亦可能受到牽連，因為其中一集搵咗黃心穎做嘉賓，依家需要重拍，計劃會搵楊明頂上！
全城關注邊個「執二攤」
暫時未知由邊個取代心穎在《法證先鋒IV》的角色，其實同黃心穎差唔多Level嘅演員都有唔少選擇，當中包括：
鄧佩儀
湯洛雯
江嘉敏
麥美恩
張寶兒