新劇《唐人街》拍攝得如火如荼，據知劇中的動作戲比上一次《城寨英雄》多，而且拳拳到肉，非常厲害。有份演出的吳家樂在社交平台上載花絮照片，相中見到伍允龍的腹肌顯而易見，但原來家樂亦不甘示弱，有六嚿腹肌，成為「爆肌」男。今年47歲的吳家樂一向予人斯斯文文的感覺，經常擔任司儀工作都是穿西裝上陣，甚少見到他展露身材的一面，沒想到原來禾稈冚珍珠，弗到漏！家樂接受《晴報》訪問時透露的確為今次拍攝需要而刻意健身，每日都只是吃白烚雞肉的健康餐，加上跑步和健身，呈現出大隻佬的感覺。他說：「其實我好為食，係肥仔底，但一直好彩手手腳腳都好瘦，睇落就唔太覺眼。直至要拍攝劇集《機場特警》嘅時候，要除衫，又要手瓜起腱，所以去操到自己大隻少少。我就衰，一拍完就放鬆晒，放假日日打邊爐又狂食，後來知要拍《唐人街》，即刻又要開始keep住身材，不過今次就要更加努力。其實雖然食雞肉，不過平時食健康餐單都有好多選擇嘅，只係今次要除衫，所以飲食方面要注意多啲。」
吳家樂在IG上載照片，驚現六嚿腹肌，非常厲害。（圖片：吳家樂IG)
為了角色健身兼瘦身，為食的家樂都被迫要食白烚雞肉。（圖片：吳家樂IG)
嘩，手瓜好強壯呀！（圖片：吳家樂IG)
家樂直言幸好同劇有好多健身專業人士，特別是伍允龍同袁偉豪等，他們教曉家樂如何去進行健康飲食，令瘦身同增強肌肉方面能夠更加事半功倍。他說：「今次拍打戲，本身都係好似一個大叔咁好瘦弱，後來變得好大隻，至於點解就要睇劇喇，我唔可以爆住，不過呢個劇男演員要除衫，女演員就露腰，所以成個劇組都食得好清淡同健康，個個都要保持身材，我自覺今次成績還可以啦，其實太遲開始操，否則會更加好。」家樂今年47歲，1994年第7期藝員進修班畢業後開始演藝事業，同年參與拍攝《阿Sir早晨》，當時只有22歲的他非常青澀，絕對是陽光的「小鮮肉」一枚，不過大多數的角色都是乖巧、文弱書生居多。2016年憑劇集《城寨英雄》裡飾演馮春美一角奪得《萬千星輝頒獎典禮2016》「專業演員大獎」。
吳家樂初出道時是一名文弱小鮮肉。(圖片：《阿Sir早晨》電視截圖)
當時年紀輕輕，都不及現時47歲來得大隻。（圖片：吳家樂IG)
家樂直言戲中需要演大叔就無辦法，但私下的他經常被讚外貌看起來比真實年齡年輕，他說：「其實除了為劇集操肌肉，平時我都鍾意運動，多數係踢波同跑步，跑步最容易啦，自己一個人就可以，唔使約又唔使任何裝備，所以我就算去烏魯木齊或者深圳拍戲，我都會帶跑鞋去跑步。呢方面都會影響埋屋企人，太太同小朋友都鍾意運動，當然佢哋唔使食到咁清淡啦，有雪糕、朱古力都會畀佢哋食，只係我自己想食都冇得食住啫。」家樂2006年3月跟其士集團主席周亦卿女兒周蕙蕙在香港註冊結婚，二人現時育有三名子女，分別是長女Nadia及一對雙胞胎囝囝Nigel和Nathan。
家樂直言愛上跑步，多做運動保持身體好。（圖片：吳家樂IG)
平時多穿西裝的家樂一除衫，令人有意外驚喜。（圖片：吳家樂IG)
家樂閒時會跟明星足球隊踢波。（圖片：吳家樂IG)
結婚當日，劉德華都有到賀。（東星圖片)
吳家樂的家庭生活向來低調，唯一公開的全家福就是這張一家五口加狗狗的手疊手合照。（圖片：吳家樂IG)