50歲人稱伍姑娘嘅伍詠薇平日看似大癲大肺、放蕩不羈，唔少網民都話好想娶伍姑娘返屋企，有情趣得嚟，仲要理性大方，加上佢處理感情問題「異常」成熟冷靜，擺明係好珍惜每段感情，先至會咁包容、咁大愛咁好嘅老婆，邊度搵？
伍姑娘1989年喺大佢31年嘅首任丈夫翁江培提議下參選亞姐，二人於1990年結婚，當時伍姑娘年僅21歲。不過好不幸地，翁江培陪伍姑娘去深圳登台期間心臟病發猝死，當時佢哋只係結咗婚13日。
嗰時我都未唱完，我先生突然離場，我仲以為佢可能想出去呼吸新鮮空氣、去一下廁所。點知唱完後，屋企人就同我講：『佢突然唔舒服、抖唔到氣，依家去咗醫院。』到達醫院，已經睇到佢喺度進行心臟電擊搶救，之後醫生就同我講：『呢個人已經離開咗。』
佢話太突然加上當年太年輕，完全唔識反應。
喪夫後受盡委屈
翁江培離世後，外界一直盛傳伍詠薇繼承了亡夫的1億7000萬遺產，伍詠薇否認傳聞之餘，更自揭當中承受不少委屈，形成今天硬淨的性格:「周圍啲人都變咗編劇，話我剋死佢、話我『有一億七，都唔使出嚟拍戲！』我通通有苦自己知，都唔會同屋企人提傷心事。鍾意我嘅人會覺得我強、我型，但唔鍾意我嘅人會覺得我好討厭。我試過喺街上竟然有唔認識嘅人鬧我八婆，我嗰幾年就係咁樣過。你依家睇我嬉笑怒罵，其實係感謝嗰幾年幫我練出嚟。」
伍詠薇同現任丈夫練海棠相識8個月就結婚，到依家已經19年，伍詠薇承認自己由少女時代已是一匹難馴服的野馬，從未想過同一個男人相處咁多年，係奇蹟咁話。佢形容都係「膽博膽」，好到幾時就幾時，佢都好多謝練海棠對佢嘅包容。
唔係「無隻眼開隻眼閉」
二人人前恩愛，但練海棠曾兩次疑似出軌事件，對上2016年一次，伍姑娘更代為向公眾道歉。人人都以為伍姑娘縱容老公，對出軌新聞容忍跨過婚姻危機時，伍姑娘重申：「我無隻眼開隻眼閉！要我『隻眼開隻眼閉』，你會睇得出我係唔舒服嘅。我點解要『隻眼開隻眼閉』？有啲人會死頂，但我唔會！不過，當第一次面對呢啲問題，我第一反應係起晒雞皮。第一次有人畀我睇嗰啲相（老公疑似出軌照）嘅時候，我係會起雞皮。」佢選擇面對同解決問題，而唔係當冇事發生過。
老公疑似出軌檢討自己
伍姑娘選擇同老公坦白咁傾：「『可唔可以繼續走落去？發生咩事？』就算佢呃我，都要講，其實我自己都有責任，嗰個階段我好鍾意拍攝工作，變咗比較少時間陪佢。而最近嗰次出軌嘅報道，我就同佢講：『走唔甩啦！唔係我睇到，係記者發現！』係好心痛、好失望。但丈夫係自己揀嘅，與其諗係唔係一面倒佢錯，倒不如檢討吓自己有冇錯。我呢個人係傻，但我都好均真、好包容，所以我覺得發生呢種事，當中我都有問題。唔係話相唔相信佢，我信呢件事屬真，但件事發生咗，我係要去包容佢、再同佢相處，坦誠溝通後，再睇吓我哋可唔可以再一起走落去。」