傳賣風水屋勁賺800萬 黎耀祥：個市好不如套現

近日樓市回升，不少持有物業的藝人看準時機，趁高位沽貨套現。有指黎耀祥早前沽出持有12年的深井碧堤半島物業，帳面勁賺793萬元。祥仔昨日出席慈善活動時，承認賣樓賺得「幾球」（幾百萬），現時沒持有物業，一家人只租樓住。

黎耀祥與太太、吳若希、孫慧雪與鄧小巧等，昨日到紅磡出席《童心同步開步禮》活動。祥仔被問到賣樓賺了800萬元時笑說：「之前賣咗㗎啦！（物業是風水屋？）無乜所謂，住得舒服就得，無話係咪風水屋，嗰排見個市好，估計樓價唔會再點升，不如套現囉！」他表示物業已持有十多年，現時只租樓住，暫未遇到心水樓盤：「十幾年先賺得『幾球』，其實本身投資唔叻，老婆投資物業都係唔叻，住嚟住去得一間，如果叻就一早有幾間喺手啦。」

祥仔表示有朋友提議他投資海外物業，例如加拿大等，提到祥仔的兒子在美國讀書，會否考慮在美國買樓？他說：「我真係有諗過個仔畢業後喺嗰邊工作，再申請埋我哋兩個老嘢過去，點知佢話要返嚟香港，因為佢喺香港好多朋友，唔捨得走。」另外，祥仔夫婦前晚出席母親節活動，透露囝囝親自下廚慰勞他們。「佢啱啱放假返香港，話整牛扒同意粉畀我哋食。個仔平時鍾意整嘢食，成個pizza都焗出嚟，有時佢失準我都會批評。」

吳若希獲囡囡送香吻

同場的靚媽吳若希和孫慧雪，同樣度過充實又開心的母親節。吳若希笑說：「囡囡得兩歲，本來老公教佢畫個心畀我，但只畫到圓形，不過佢送咗個吻畀我，已經好開心。」她自言希望再過一、兩年，等囡囡長大些，才計劃生第二胎。

至於孫慧雪早前與老公帶兒子到日本旅行：「個仔21個月大，依家成30磅，去旅行唔肯落地，要日日抱住佢，抱到手瓜都粗咗！」她笑指囝囝開始愈來愈多說話：「佢開始口花花，話鍾意女同學，人細鬼大！」

採訪︰Pauline

編輯：李潔盈

美術：梁政敏