《東張西望》日日播，大家觀看機會自然多，討論次數亦隨之增加。本來觀眾、網民都大讚節目用攝影機為市民發聲，揭發民生問題、不公平真相，成功迫使政府有關機構行動，不過近日突然出現罕有負面評價，斥責《東張西望》女主持黃穎君博上位。事關前幾日適逢母親節，節目派出攝製隊與黃穎君到酒樓、花檔訪問一眾孝順仔女除了買花向母親聊表心意，還會如何舉家慶祝。惟有觀眾發現黃穎君的上衣太低胸，每次俯身訪問受訪者時都會露出乳溝，訪問小朋友時更加疑似露出內衣，令網民紛紛在討論區發表帖文批評過分暴露，其中一個以「嘩《東張西望》主持露晒X想點？！」為題，激起不少人討論。有人就話：「嘩合家歡時段播啲咁嘅嘢）」、「女主持走晒光，我冇見過細路仔笑得咁開心」等，有人就覺得黃穎君是抄上次阮嘉敏著緊身露腰sport bra加貼身長褲行山上位，紅到中台的模式博上位。
(TVB電視截圖)
先撇開是否走光的問題，不少網民因此關注這位女主持，以為她是新來的記者。但其實黃穎君原來加入TVB已有7年，而且是高才生。
靚女身材好學歷高 落選港姐勁有演藝天份
現年30歲的黃穎君曾就讀合一堂學校上午校及香港管理專業協會羅桂祥中學。她曾在警察訓練學校受訓14週，因繼續學業而退出警隊。其後畢業於香港大學教育系學士（主修通識教育科）、香港中文大學社會系碩士以及由香港電影編劇家協會開辦，導師包括林超榮、文雋、陳慶嘉、陳嘉上、莊澄等資深電影人的香港公開大學創意電影編劇課程。除了學歷高，黃穎君美貌、身材都獲得肯定，2010年，她成為《工展小姐選舉》冠軍，還奪得多個獎項，包括最具才藝獎、最具魅力獎、最合眼緣獎及最佳品牌推廣獎。2012年，黃穎君參選2012年度香港小姐競選，期間由於樣貌被指與藝人謝安琪相似而備受關注，雖然最後未能擠身決賽，但順勢加入TVB開始演藝路。
美貌與智慧並重的黃穎君有幕前演出經驗，曾參演「蝦仔爹哋」音樂劇，原來她亦很有演藝天份，僅參演過2劇都被觀眾點名讚好。第1套是《降魔的》中飾演「龍貓」何遠東的老婆龍貓嫂，當時何遠東被無辜壓死，黃穎君同一對子女趕到醫院，手抱個B女不斷喊：「老公你點解要丟低我哋…」。之後何遠東在「小馬」馬國明幫助下回魂，黃穎君一見到老公即刻淚如雨下，聽到他叫自己改嫁更加寧死不從，堅持從一而終：「我嫁咗畀你，就係你老婆！」，最後同何遠東緊緊抱擁，好多觀眾都睇到眼濕濕。之後黃穎君又於《福爾摩師奶》飾演「香廬」的租客有力嫂，陳松伶負責查案製造懸疑緊張感，她就與老公不時在家中呻吟，大爆性暗示的搞笑對白，為劇集增添不少笑位，帶挈她人氣上升，在街上更被途人認出。
(TVB電視截圖)
(TVB電視截圖)
轉玩主持作家做才女一樣掂
黃穎君一直致力於司儀及演員的雙線發展，至今參演多齣劇集及擔任各大商場活動、記者招待會、產品發布會、春茗晚宴、wedding party等主持，曾一度擔任TVB娛樂新聞台粵語主播，如今是《東張西望》記者。為了多元發展，黃穎君於去年書展期間推出哲學散文，結合古今中外哲學家的金句，發表對生活體悟、愛情、親情及友情的睇法。近年，黃穎君亦開始擔任多間慈善機構的活動大使，並熱衷參與社會服務義工活動和籌款活動如心晴行動。2016年，黃穎君更獲選為香港義工聯盟傑出義工。雖然黃穎君多才多藝，但大家睇怕要放棄，因為她早就於2015年結婚，老公丘一峯正是J2節目《後生仔傾吓偈》的監製！