戲曲中心新劇目登場 感受茶館表演文化

西九文化區首個地標式表演藝術場地、西九文化區戲曲中心年初已正式開幕，唔少戲曲愛好者當然興奮，黛安都唔例外！聽公關姊妹講，位於戲曲中心1樓嘅茶館劇場有新劇目「茶館劇場粵‧樂‧茶韻」，由著名粵劇老倌羅家英擔任藝術策劃同導演，仲會重現昔日結合戲曲表演嘅茶館文化，有戲聽、有點心食，絕對唔可以錯過！

黛安知道，「茶館劇場粵‧樂‧茶韻」約一個半鐘嘅演出入面，將由本地年輕演員同樂師組成嘅「茶館新星劇團」，為觀眾送上精采演唱、折子戲同音樂演奏，觀眾可同表演者近距離接觸，再配合導賞員深入淺出嘅解說，輔以茗茶點心，等大家可以親身體驗戲曲藝術嘅獨特氛圍，啱晒對中國傳統文化感興趣，或者初次接觸戲曲藝術嘅觀眾！

節目逢星期三至日上演，票價分318元同368元，60歲或以上、殘疾人士及陪同者、全日制學生仲有半價，目前部分場次嘅門票已經售罄，想睇就要快手喇！