正於「黃Viu煲劇平台」播出的《PTU機動部隊》，每一集出場嘅人物都充滿驚喜，劇集除咗由林峯、蔡卓妍、方中信領銜主演外，仲有好多老戲骨同「失蹤人口」演員，其中有第一集出嚟就非常搶戲嘅林雪。林雪喺2004年憑電影《PTU》奪得第九屆香港電影金紫荊獎最佳男配角，闊別十年再度接拍「PTU」題材，同「PTU」可以話係結下咗不解之緣。
延續肥沙Hea爆性格
林雪喺《PTU機動部隊》延續電影《PTU》角色肥沙嘅人物性格，佢曾經講笑咁話角色懶惰、似足自己，不過佢之後再做訪問就為自己大平反：「雖然角色、演員唔同咗，劇本同電影都有分別，但係我好熱愛呢個角色，因為我嘅角色，同我平時個人差唔多，我平時做人有少少懶，但係我有擔當，我為咗懶，會諗好多我應該做嘅嘢、應該做好嘅嘢。其實我懶，並唔係懶做嘢，我係懶做無謂嘢，我用晒我嘅時間做有用嘅嘢，所以你哋錯喇，你哋睇錯咗我喇！」
開到口恨攞獎
林雪自言對PTU系列有情意結，「情意結就梗有啦，我憑《PTU》（電影）攞咗金紫荊最佳男配角，係我第一個獎項，亦係我第一套領銜主演嘅戲，到依家我拍返《PTU》（劇），有少少仲係停留喺我攞獎嗰陣時興奮嘅感覺入面。」佢仲話希望憑呢套劇再得獎：「我為咗角色而演戲、為咗喜愛呢個工作而演戲，唔係為咗獎項⋯⋯講呢啲說話，都唔係心裏面嘅說話，其實邊個演員唔想證明下自己，可以做得到呢？獎項就係最好嘅證明，其實我平時話：『哎呀我都唔恨領獎！』我講嘅都唔係心裏面嘅說話，因為我係演員嚟，你哋應該明嘅！」
適當時候博到盡
林雪在《PTU機動部隊》中飾演重案組警員，佢搶先劇透最感人的一場戲：「最鍾意就係我被賊人『搞掂咗』嗰場戲，因為我用簡短嘅幾句對白，總結咗我戲入面嘅人生。正如我啱啱所講，我唔會用時間做無謂嘢，我喺差館冇咩事都係休息吓，成日都休息吓，哈哈，但係遇到真係要為大眾服務、甚至獻出生命嘅時候，我係一如既往咁樣走到最前面，所以我覺得嗰場戲完結得好好，多謝導演，就住嗰場戲我哋傾談咗好耐，我咁樣走係好啲。」
兩個人影響一生
林雪早於十四、五歲從天津來港，由第一份工做傢俬學徒到做雜工，人無目標又四處遊蕩，直到有次他在桌球室偶遇伯樂林正英，對方提點他應該好好打工，更建議可以帶他去片場做場務，自此林雪便踩入影壇，後來再得到恩師杜琪峰提攜，開始漸有所成，所以佢對於杜sir同林正英的恩情畢生感激。
林正英
杜琪峰