變身、豪華靚衫加埋好聽嘅歌，相信大家一定會諗起魔法少女動畫《我係小忌廉》，當中主角小桃係一個10歲嘅小學生，偶然遇到外星人嘉寶、嘉麗之後就得到魔法，變成16歲少女小忌廉，仲加入演藝界成為紅透半邊天嘅明星。《我係小忌廉》喺上世紀80年代掀起追睇熱潮，風靡港日台，當時香港無論男女老幼都成為裙下之臣，係陪伴唔少港人成長嘅回憶。由即日至6月12日，灣仔築地山貴水產市場就推出「我係小忌廉 初夏祭」，希望粉絲可以打卡影相兼食嘢，搵返童年回憶。不過喺去之前，身為小忌廉粉絲，有3樣嘢你一定要知！
1. 化妝風格改變
喺1983年嘅時候，原版小忌廉臉型好圓潤，身材都冇咁突出，妝容都好濃。不過去到30周年，創作者高田明美老師就改咗風格，將小忌廉嘅妝變淡咗，臉型長咗，輪廓都突出咗，五官精緻好多，緊貼社會嘅審美觀。
2. 主題曲大熱
「星空裡萬物在轉，歷億萬年......多甜蜜這張可愛歡笑面，像是十全和十美這小忌廉...」《我係小忌廉》有樣嘢好特別，就係為佢演唱主題曲嘅人都係得呢首歌深入民心。好似日本代表太田貴子，自從佢唱咗主題曲《Delicate的期望》，幫埋主角小桃同小忌廉配音之後，就成為一代人嘅經典，之後就引退咗仲結婚生仔，雖然復出返，但人氣已不如前。至於香港嘅戴蘊慧係已故香港樂壇教父戴思聰嘅大女，喺唱完粵語版主題曲，冇幾耐佢就淡出樂壇仲結婚移民去新加坡。
3. Hit足多年
《我係小忌廉》雖然唔係第一套少女變身卡通片，卻是影響力最深遠嘅一套。佢無論喺日本定香港都係只播咗短短一年，日本播出時間係1983年7月1日至1984年6月29日，而香港TVB播出時間：85至87年，但就Hit足35年，全因為佢不斷出products、不斷回帶，為粉絲帶嚟新鮮感。
講番呢個「我係小忌廉 初夏祭」，設有「立體小忌廉 x LED花樹」同「月下之嘉寶、嘉麗」場地裝置，仲有5款主題美食，包括「小忌廉夢幻特飲」（連香檳杯、小星環杯夾及杯盒）、「小桃日式凍蒸蛋」、帆立貝配吞拿魚同三文魚籽等食材嘅「嘉麗海鮮丼」、「小星環 x 夢幻小丸子牛奶雪糕」，以及「嘉寶 牛油果溏心蛋沙律」。限定商品好似「小忌廉伸縮泊車神仙棒」、「小忌廉35周年紀念布袋」同「小忌廉初夏祭T恤」已經發售，不過好快已經賣晒，依家店方補貨中，好快有好消息畀各位粉絲。
(《晴報》圖片)
(《晴報》圖片)
(《晴報》圖片)
(《晴報》圖片)
今次呢個初夏祭最勁係得到創作者高田明美老師嘅認可，好難得喺Twitter分享呢個消息，所以粉絲一定唔可以錯過！
我係小忌廉 初夏祭 @ 灣仔築地山貴水產市場
日期：即日至6月12日
時間：中午12時至晚上10時30分
地址：灣仔碼頭2樓築地山貴水產市場
網址：yamataka.hk
▼click以下link知多啲啦