久未喺香港拍劇嘅51歲盧慶輝近日喺劇集《PTU機動部隊》入面飾演警司，依家嘅佢已經由一個「花𡃁」變成一個佬，多咗一份成熟男人味之餘都冇乜走樣，勾起咗唔少人嘅集體回憶。
當年喺無綫長篇劇《真情》中扮演唐立生人氣急升，憑住青靚白淨、官仔骨骨嘅外形深得觀眾歡迎，原本前途一片光明，不過2001年時，佢突然消失喺幕前。
同《真情》入面嘅阿媽「好姨」事隔多年之後合照。
盧慶輝當年上位之後緋聞不絕，除咗同《真情》嘅彭子晴被傳戲假情真撻着外，就連該劇的編審陳寶華都被指牽涉其中。不過之後盧慶輝公開承認與張慧儀發展戀情，後來仲同梅艷芳、陳德容傳出緋聞，被指關係七國咁亂，到2000 年傳出他到澳門玩樂時遇襲，令他形象受損。
呢一Pair深入民心到喺Google Search盧慶輝，就會有彭子晴。
不堪受壓轉行
盧慶輝指當時嘅負面新聞令佢好大壓力:「初出道形象都好正面，但一下子變得好負面，當時因為年輕好多事都唔識處理，負面新聞湧現，也令自己唔太舒服，開始壓力很大，所以就決定離開。」佢話當時咁啱遇到做房地產生意嘅朋友，就嘗試一下轉行北上，睇吓係咪適合自己。
回憶殺！
相隔十六年盧慶輝再拍劇，事關前年佢喺大陸參與甄選新人比賽，過程中令佢戲癮大發：「睇到人哋做戲，自己就有啲放唔開嘅感覺，對人哋嘅演技畀意見，覺得用點樣嘅方法去演會比較好，久而久之就勾起自己嘅戲癮，開始重投幕前演出，但主要拍國內的網劇為主。」
三日認定太太為終身伴侶
北上除咗令他找到方向外，仲遇到拍拖三日已認定為終身伴侶嘅女友:「同太太係做嘢識，起初冇聯絡，隔咗一年之後因為工作關係再合作。我同她拍拖第三日，就知道佢是我將來嘅老婆，這番話我有同佢講，但佢當時竟然話同她講呢番話嘅人唔止我一個。最後大家拍拖半年就決定結婚。」
唔做直昇機家長
結婚8年，依家囝囝都已經5歲，提起小朋友，佢父愛滲晒出嚟：「講真有小朋友成個人都成熟咗，以前自己做仔嘅時候，一直都處於接受狀態，家人對你好係天性，依家自己做爸爸，盡量會畀最好嘅阿仔。發現小朋友一定要教，成長過程中對與錯真的要解釋給他聽，舉例給他可以反思。」佢自言唔會做直昇機家長，會放手畀小朋友嘗試：「小朋友好多行為都出於自然，我同他相處期間都會觀察，再慢慢教導同解釋，冇危險情況下，都會盡量畀佢去做，小錯可以畀他犯，犯錯了就會解釋給他聽，讓他改過。 」