邵逸夫獎得獎名單出爐 探索基因工程星際空間

邵逸夫獎噚日公布咗得獎名單，3個組別嘅得獎科學家分別係2名美國學者和1名法國學者，黛安每年都好期待，想知道有邊啲新發明同研究，因為科學家和學者嘅突破性研究，為大家生活帶來好多深遠影響。

邵逸夫獎基金會噚日公布第16屆得獎名單，分別為天文學獎、生命科學與醫學獎和數學科學獎，每項獎金120萬美元（約936萬港元）。

今屆生命科學與醫學獎得主，係美國康奈爾大學威爾康奈爾醫科研究生院教授同美國紀念斯隆凱特琳癌症中心成員瑪麗亞‧傑辛（Maria Jasin），表彰佢證明去氧核醣核酸中定點雙鏈斷裂，會刺激哺乳動物細胞基因重組。呢項開創性工作奠定咗直接引致能編輯哺乳動物基因組特定位置嘅工具產生。

而天文學獎得主就係美國加州理工學院大衞‧莫里斯物理學講座教授和特別項目副校長愛德華‧史東（Edward C Stone），由佢領導嘅旅行者項目，係過去40年間，改變咗我哋對4顆巨行星和外太陽系嘅了解，開展咗探索星際空間嘅任務。數學科學獎得主就係法國索邦大學數學教授米歇爾‧塔拉格蘭（Michel Talagrand），表彰佢研究集中不等式、隨機過程嘅上確界和自旋玻璃嚴謹結果。