《婚姻合伙人》播映以來，得到不少正評，雖然劇集是兩年多前拍落，但背景都係講地產經紀，永遠不會過時，而且喜劇手法搞笑又誇張，觀眾睇得非常開心同享受。《晴報》小編期待已久，終於等到琴晚嗰集，故事講到Ruby（林秀怡飾）同朝仁（陸永飾）分別在感情和事業上都感到意興闌珊，在浴缸上自吞安眠藥企圖自殺，不過兩人將自殺劇情變成搞笑場面，為爭安眠藥在水上激戰，林秀怡的性感打扮更是非常吸睛。
劇集《婚姻合伙人》貼地又搞笑，睇得觀眾好開心。（網上圖片）
兩人為了自殺在浴缸激戰。（圖片：《婚姻合伙人》電視截圖）
一個感情失意，一個事業失意，齊齊尋死爭食安眠藥。（圖片：《婚姻合伙人》電視截圖）
尋死不果，反而令兩人的感情升溫。（圖片：《婚姻合伙人》電視截圖）
小編打電話畀陸永問佢有冇被老婆扭耳仔，點知佢話：「算咩激戰吖，爭住自殺之嘛！兩年幾前拍，拍得幾辛苦，因為浸完水覺得唔夠好，想再拍一次，所以要由頭到尾吹乾全身，之後再浸過重拍。當時梗係唔會尷尬啦，始終係笑劇，唔知點解原來佢變咗性感女神，仲被人叫做『水野秀怡』，但兩年幾前合作時，佢係TVB數一數二男人婆嚟呀嘛！所以完全冇尷尬！」好多人都讚陸永同林秀怡好搶戲，陸永話：「大家睇得開心就好喇！多謝大家鍾意，高Ling（高海寧）同秀怡一齊上討論區，真人即時回覆同巴打絲打傾偈，真係好叻女！（你唔加入？）我係CD-ROM嚟呀！」
陸永和林秀怡在劇中有不少火花。（圖片：林秀怡IG)
林秀怡近排頻頻向觀眾致歉，事關她在劇集中頻頻露腿，她笑稱不好意思，秀怡都有接受小編電話訪問，佢話：「拍攝時冇乜尷尬，大家好投入做好件事，因為啲水不停郁，所以我哋都有討論點樣打交動作會好睇啲。其實拍之前都有減肥，不過我就愈拍愈肥，好多人話我好大隻呀！嗚～」提到佢同高Ling殺入連登，同巴打絲打直接對話，秀怡話：「係呀，其實高Ling玩先，佢話好多巴打都話想班演員一齊入去傾，咁我就開返個account，其實之前一直都有睇開，不過依家有埋account，就可以即刻回覆大家。」林秀怡2008年在訓練班畢業後出道，在多個潘嘉德監製的劇集都有參與演出，較早前《不懂撒嬌的女人》和《是咁的，法官閣下》都有突出的演技，備獲觀眾讚賞，更獲得民選飛躍女演員，非常厲害。而她身材驕人，在劇集曾經有性感泳衣打扮，吸引不少巴打留意，在網上更將她和孫慧雪封為「水野秀怡」和「波多野雪雪」，列為連登女神，今次她加入連登，相信定必大受歡迎。
林秀怡為劇集刻意減肥，但愈拍愈肥，被網友彈佢大隻。（圖片：林秀怡IG)
林秀怡身材一向非常好，之前拍劇同孫慧雪同場，都沒被比下去。（圖片：林秀怡IG)
劇中林秀怡和高海寧是兩姊妹，沒想到今次一齊殺入連登。（圖片：林秀怡IG)