現年32歲的高海寧（高Ling）於最近播岀劇集《婚姻合伙人》擔正做女主角，飾演拜金貪錢的地產經紀「貝競枝」，唔少人都讚高ling演技有進步，睇得好投入。「貝競枝」自小被父親拋棄，搞到佢憎自己爸爸，亦造就佢強勢、愛錢的性格。不過現實入面的高海寧完全相反，係個不折不扣嘅乖乖孝順女，超級錫屋企人，佢每逢放假必定抽時間回南京探婆婆。近年高Ling更默默接job賺錢，成功上車做業主，一個人努力供樓，而收租嘅錢全歸屋企人，除此之外，高Ling每個月仲會畀家用，認真孝順！佢提到家人時亦好甜蜜：「家人同健康先係最重要，我努力掙錢都係為家人，希望可以買多一層樓收租，畀最好嘅生活佢哋！」
(高Ling於《婚姻合伙人》飾演拜金貪錢的地產經紀)
(高海寧同媽咪)
高海寧出生於南京，由於父母要返香港工作，惟有交佢畀婆婆照顧，高Ling自小跟婆婆一齊生活，因此佢哋感情好深厚。直至高Ling中一，佢先嚟香港同家人團聚，不過家境唔算好，一家五口租住旺角一個好細嘅單位，而父母靠做小販，於女人街擺檔賣銀器養起頭家。幸好高Ling爭氣，學業成績不錯，會考有22分，好叻女！高Ling 係選港姐入行，其實原本佢並唔想參選，因為性格天生較怕醜，但考慮到媽咪兒時夢想係做歌手，為一圓家人夢想，加上想賺大錢養家，佢先毅然去選港姐，雖然三甲不入，但總算順利入行。
(高海寧同爸爸)
高Ling現時同婆婆分隔兩地，時常惦念遠在南京的婆婆，因此佢幾忙都會趁空檔同婆婆視像通話。放假時，佢更加會飛返去南京探婆婆，仲話見到婆婆嘅笑容就乜都值得！
(高Ling跟婆婆感情深厚)
做咗藝人高Ling機會幾多，做主持又默默接job，惟剛開始收入始終唔多，父母依舊要喺女人街擺檔搵食，爸爸更試過涉嫌賣假銀器而被海關拘捕，當時搞到高Ling又驚又內疚，除咗擔心爸爸官司，更多係自責同心痛：「我覺得自己做極都養唔到屋企人，我好想父母唔使再喺女人街擺檔，夏天太熱，女人街咁焗成四十度都有，太辛苦啦！屋企有兩個細佬讀緊書，又要供樓、供車，我會努力養起頭家！」
(高Ling弟弟順利大學畢業，令佢好欣慰)
幸好一切苦盡甘來，現時高Ling終於捱岀頭，新劇擔正做女主角，工作機會多，又成功買樓做業主。不過佢亦坦言要供樓壓力好大，仲試過因為咁後腦驚現「鬼剃頭」，成個5蚊銀咁大嘅洞，真係好慘！希望高Ling唔好再畀咁大壓力自己，相信之後屋企環境會愈嚟愈好！
(高Ling後腦驚現「鬼剃頭」)