學整紙龍舟 認識傳統漁家文化

仲有約兩星期就到端午節，按傳統，除咗食糭外，當然仲包括睇龍舟賽，今年仲可以親身整「龍舟」！香港仔龍舟競渡大賽委員會今年設計咗色彩斑斕嘅「紙龍舟」，唔好睇少呢隻小龍舟，黛安聽公關姊妹講，原來同香港仔龍舟好有淵源，傳統大龍舟進行下水儀式嘅時候，會先將紙龍舟放喺水面，祝願健兒平安同旗開得勝，因此紙龍舟代表住漁民傳統嘅祝願文化。

大會將會喺端午節正日，喺香港仔海濱公園海旁舉行繽紛龍舟紙藝工作坊，大人細路以至文青一族都可享受熱鬧氣氛，同時令更多人認識傳統漁家文化。除咗紙龍舟外，仲可製作紙龍頭飾，將仿真嘅龍頭配上雙面顏色紙，完成之後可戴喺頭上，入型入格，現場亦有面部彩繪畫師，幫大家面上添色彩，畫上各式各樣海洋生物，全部活動費用全免，黛安真係要搵埋班好姊妹，一齊去參加先得！