陳凱琳喜獲囝囝「禮物」

今年情人節誕下兒子鄭承悅（Rafeal）的陳凱琳（Grace），剛度過做了媽媽的第一個母親節，雖然囝囝只得三個月大，但能夠乖乖的與父母一齊食飯，這份禮物比任何物質更珍貴。

陳凱琳和「牛雜妹」李美琪昨日獲邀到旺角出席一個手袋發布會，二人並獲贈新款的手袋，而Grace就即場印製卡片套送給幾位粉絲。Grace受訪時，被問到囝囝出世後，家中物品是否都會刻上囝囝的名字？她立即show出左手手腕戴着、刻有囝囝英文字頭「R」字的手鈪，更面露幸福笑容，不過她說未有訂製家庭裝。

談到今年做了媽媽後度過首個母親節，Grace說︰「囝囝仲好細個，所以都係一家三口喺屋企食餐飯就算，好難得當日佢無喊，可能佢知道自己大個咗，哈哈！（嘉穎有無送禮物？）佢有問過我想要乜，嗰一刻我無諗過要禮物，反而一家三口一齊已經好滿足，囝囝乖已經係好大嘅禮物。」父親節將至，她又可有計劃怎樣慶祝？Grace笑言，幸好母親節沒要求嘉穎送禮物給自己，所以她就不用頭痛買禮物給他，當然都會叫囝囝乖些。

Grace又說對於囝囝的所有第一次，都覺得特別和有意義，就像近日她為囝囝剪掉的第一撮頭髮，就小心翼翼地用個袋仔保存着，當作留念，「不過唔係我親自剪，係搵髮型師剪嘅，而且喺囝囝醒咗嘅狀態剪，剪嘅時候佢郁咗一陣，不過都算順利，仲有佢嘅臍帶、腳印仔，遲啲出牙又可以留起乳齒。」

祈求改名增強財運

同場的李美琪（Monnie）最近忙於拍攝ViuTV劇集《Me Too》，題材以辦公室性侵案為背景，問到現實中可曾遇過這類事情？她說︰「我由細到大有『鐵沙掌』同『男人婆』外號，男性朋友只會當我兄弟，反而身邊朋友就試過類似的遭遇。」她又稱想過改名轉運，不過相士改了幾個名給她揀，都覺得不好，她並笑言︰「『美琪』個名，隔幾年就有一個，覺得係永恆不死，我希望改個名有『金』嘅，賺多啲錢。」

採訪︰Pauline

攝影︰林良明

編輯：黃寶恩

美術：顏玉玲