「中環夏誌」下月開鑼 體驗STEM智慧城市

話咁快就5月尾，距離暑假又近咗一大步，各位家長為仔女安排好暑期活動未呢？黛安有個好推介，嚟緊6月26日起，中環海濱將會有一個為期68日嘅大型暑期活動「中環夏誌」，集齊藝術文化、嘉年華會等多種合家歡元素，今年仲首次加入智慧城市主題，舉行「智慧城市遊樂園」，到時有機會親身參與電子毛筆、數碼靶場等結合科技嘅遊戲，仲有無人機表演、石頭工作坊等等，非常多元化！

智慧城市聯盟會長楊文銳（Gary）同黛安分享，以往一提起智慧城市，唔少人總覺深奧，所以今次就設有體驗、學習、玩樂3大區，以互動展品作主打，仲有唔少STEM工作坊，砌吓車仔、小玩具等，畀大家「玩到、睇到、感受到」！Gary仲透露，到時每晚都會有無人機陣式表演，仲有機會親身坐上無人駕駛車體驗，等大家貼地感受智慧城市！

今年仲有新加入嘅「石頭節」，展出過千件由世界各地藝術家創作嘅石頭藝術品，仲會安排2,000人砌出口琴形狀，打破健力氏最多人砌樂器形狀嘅世界紀錄；同收集萬張兒童畫，寄到偏遠山區兒童做「筆友」等，絕對值得參與！