【聲明】港生活網站並無進行電話推廣活動

為見囝囝寧推Job 鄭嘉穎︰老婆地位都退後啲

發佈時間: 2019/05/27

鄭嘉穎和陳凱琳(Grace)的囝囝鄭承悅(Rafael)目前已三個多月大,升呢做爸爸的嘉穎有仔萬事足,不但為湊仔推掉內地劇,更直認阿仔排第一,老婆都要讓路。不過他立即「補鑊」,笑言一生最愛仍是太太。

鄭嘉穎日前與太太陳凱琳為囝囝舉行百日宴,好友如胡杏兒一家、馬國明及唐詩詠等齊齊出席。昨日嘉穎首度出席奶粉品牌活動,他笑說多得兒子帶挈︰「證明我升咗呢,以前呢啲活動得陳豪做之嘛。」他表示當了爸爸後,心態明顯轉變︰「以前比較自我中心,工作行先,依家以家庭為重,囝囝出世後,樣樣小朋友行先,老婆(地位)都後少少。」司儀楊洛婷指嘉穎喜愛網球,日後會否栽培囝囝成為亞洲網球王子?嘉穎笑說︰「係世界網球王子!」

嘉穎受訪時,問他會否不捨得開工,想留家中湊仔?他笑說:「如果短期工作都ok,如果走三、四個月就真係太長,所以都試過推內地劇。我覺得自己好幸運,可以揀工作去做。同埋依家阿仔日日唔同樣,每朝起身都會衝去睇下佢咩樣。」

陳凱琳唔覺換片臭

嘉穎表示,目前與陳凱琳在湊仔上分工合作:「太太鍾意換片,佢話唔臭,係香㗎喎!我就負責餵奶同掃風,同BB沖涼就大家都識,我哋會分工,知道自己崗位。」提到他指Grace在家中地位不及兒子,他笑說:「因為阿仔依家最需要人照顧,如果生第二個,又會退一退㗎,不過等太太唞下先。我補番鑊,其實太太係至愛,仔女會長大同離開你,最後一齊嘅人都係太太,咁講今晚返去應該無事,哈哈!」

採訪︰Pauline

攝影︰林良明

編輯︰李潔盈

美術︰梁政敏

胡杏兒(左)催促嘉穎生第二胎,如果生囡囡可以對親家。(IG圖片)