康城影展電影周登陸K11 MUSEA 鄭志剛冀打造「文化矽谷」

K11集團創辦人及新世界發展執行副主席鄭志剛（Adrian），早年將文化和商場結合，創立咗K11呢個創意文化品牌，黛安聽公關姊妹講，今年11月佢同康城電影節主席Pierre Lescure，以及康城電影節總代表Thierry Frémaux，將「Festival de Cannes Film Week」（康城影展電影周）首度帶來亞洲，落戶香港K11 MUSEA！

每年康城電影節，都聚集咗來自世界各地嘅電影人，一齊欣賞當代電影大師作品，接觸影壇新銳力量。Pierre話，香港電影和康城電影節早已結下不解之緣，曾有多部參展作品大放異彩，香港絕對係舉辦呢件影壇盛事嘅不二之選。Adrian都話，好榮幸可以將佢帶來香港，將國際一流嘅電影作品帶畀世界各地觀眾，喺香港開拓「文化矽谷」。

電影周會喺11月12號至17號舉行，12號會有盛大開幕晚會，為一連6日嘅影壇盛會揭開序幕，期間會放映康城電影節2019其中6部官方評選作品，多位國際同本地電影巨星會華麗現身，影壇巨頭仲會親身主持電影大師班！