歐陽震華（Bobby)在1982年演員訓練班入行，由跑龍套開始，直至走上男主角一線小生的地位，至今已經37年，有「收視福將」之稱的他人緣甚廣，跟他合作過的幾乎都成為好朋友。拍攝超過100部劇集，跟不同的女演員合作過，也締造出好多熒幕上的另一半，成為經典，當中包括宣萱、蔡少芬、滕麗名等等。
Bobby拍過百部劇集，合作過無數女星，但佢話次次都係最棘手。(《晴報》圖片)
《壹號皇庭》的陳秀雯
「我都好鍾意同陳秀雯做拍檔，當時簡直係要將冰山劈開。印象中第一次同人拍接吻戲就係佢，之前同戚美珍、劉嘉玲嗰班點敢呀？陳秀雯食素，我食肉，我心諗會唔會過啲『肉氣』畀佢，佢會嘔呀？不過佢好大方，開心見誠講想點做，咁當然我唔會亂嚟，唔會濕吻，點到即止錫完，即時如釋重負。角色『余在春』好多時候都夾硬來，陳秀雯先肯就範，有場戲佢同我都著好鬼薄嘅絲質睡衣，兩個近距離接觸會唔好意思，所以我提出，先用棉胎包住我自己，好似成條腸粉咁，佢咪可以隨便亂郁囉，又唔使尷尬，我面皮厚啫，唔代表我唔怕尷尬！」
Bobby成名作之一的《壹號皇庭》跟陳秀雯演一對。（網上圖片）
Bobby為了尊重對手，主動用棉胎包實自己。(圖片：《壹號皇庭》電視截圖)
《美味天王》的關詠荷
「感覺我好似馴獸師咁，棘手嘅人全部推晒畀我，關詠荷當年都係冇人敢埋佢身，佢氣場好勁，我同佢第一部合作係拍《醉打金枝》，我又成個傻佬咁咩都亂講，成日怕講錯說話，我講完見佢冇反應，當佢望一望我，我就知瀨嘢。不過，同佢拍戲默契好好，好多位都唔使傾自動波。記得《美味天王》我同佢直情得獎拎『最佳惹笑冤家獎』，個劇我演『田味吉』有頭髮加鬍鬚，要同佢喺沙灘攬住錫，攝影機就圍住我哋360度轉，我同佢個嘴全程要貼住，但佢叫我講吓嘢，因為講嘢個嘴嘴郁郁地會似，咁惟有用腹語去講。」
Bobby同關詠荷合作好多套劇集，其中《陀槍師姐》的娥姐同小生絕對係經典。(網上圖片)
年底開新劇與萬綺雯對手
近年Bobby的劇集量明顯減產，貴精不貴多，以劇本為主要考慮，當然對手都是重點，問到是否想好好養生？Bobby稱之前突發生病已經康復：「接劇唔想咁密，演戲咁多年喇，真係唔拍得咁多，唔可以成日都見住我一個。我再吸納觀眾嘅進步空間唔大，而且呢個年紀演嘅角色要專業啲，唔可以再談情說愛，唔通仲演《壹號皇庭》追陳秀雯啲戲咩？我呢個年紀層嘅女演員嫁得就嫁，退隱嘅退，只剩萬綺雯呢個美魔女可以。」Bobby稱在《愛回家》入面見到萬綺雯的影子，他說：「《愛回家》入面個垃圾清（周梓盈飾）好似萬綺雯，同佢一模一樣，個樣唔算最似，但動靜同講說話嘅嘴形係一樣，我同佢講唔使驚，萬綺雯返TVB只係拍一部就走，唔使怕競爭，垃圾清絕對係萬綺雯接班人！咁我呢？我同佢演同一個劇，垃圾清演佢後生，咁我搵坤哥演我後生啦！哈哈哈！」
Bobby快將開拍的新劇將會跟萬綺雯合作。（圖片：萬綺雯微博）
Bobby笑指如果今次《愛回家》收視爆，新劇實行要群姐取代女主角萬綺雯。(《晴報》圖片)
問到如果同「群姐」許思敏加接吻戲，他會否接受？Bobby說：「我係演員嚟呀嘛，怕咩？我頂多同老婆交代，但群姐佢有幾個仔女加幾粒孫喎，佢要交代好多人！群姐做定心理準備啦，下一套可能會架喇！如果我客串呢兩集《愛回家》成40點收視，可能新劇即時換走萬綺雯，改群姐上！」
《愛回家之開心速遞》收視長期高企，比黃金兩線劇還要厲害，不少人認為香港劇集質素下降所致，Bobby卻不認同，他說：「我哋冇變差，港劇我一直都有睇，因為好方便，扭開電視就睇到，當然劇集實會有參差，但其實近年好多劇集收視都好高。外國劇集唔好嗰啲冇人講，大家唔知啫，咪一樣有，所以唔可以一概而論。」被稱為「收視福將」，Bobby不認為是壓力，因為這個不是獎座，亦冇人要同佢爭呢個位，他笑言：「叫我師奶殺手簡直係貶低我啦，明明我男女老幼都有支持者。」
「賺錢唔使賺到盡」
近年跟Bobby同期的無綫演員很多都北上發展，因為內地多機會而且待遇豐厚，令香港的實力派演員買少見少，而Bobby繼續堅持留香港拍港劇。他表示：「做人做事不一定講錢，我有飽飯食唔會餓就得啦，得閒咪做吓有意義嘅事囉，好似今次客串《愛回家》，做完出來大家開心事。我唔想成日做常規嘅事，人人都會話係啦你應該去襯萬綺雯啦，但我返去襯群姐喎，視野即時好闊，群姐開心我又開心！依家工作方向都一樣，錢少啲拍得開心就好喇，人腳啱玩就最好，好多嘢唔使企得咁硬，唔好局限自己，搵錢都係想使開心錢啫，我就算北上工作都會返落嚟，呢度係我屋企，錢搵唔晒嘅，唔使吓吓搵到咁盡。」
Bobby話唔想退休，一直演到老。（《晴報》圖片）
Bobby是電視迷，他追看《鐵探》，亦有睇《倚天屠龍記》，他表示好想同惠英紅合作，兩人80年代就認識，但合作的機會好少，他認為劇集入面「Madam Man」的角色，全香港只有惠英紅可以駕馭到，別無他選，希望將來可以合作，跟她學習。今年59歲的Bobby沒想過退出幕前，亦沒打算甚麼時候要退休，他說：「之前有人叫我演黃宗澤老竇，嘩，拍完仲得了？一定個個劇本都係做老竇，我演的話，咁羅樂林一輩演咩？我唔想呀，畀我玩多幾年先啦，最終《賭場風雲》我演佢阿哥！」他表示演員一生都可以演戲，冇退休年齡，拍戲辛苦但好好玩，他說：「只要仲有記性、有精神同有體力，就可以繼續拍啦！你睇《倚天》入面個張三豐，我見到佢雙眼好有神，劇入面佢係武功最好嘅人，佢好演得出份神髓，我上網查，原來佢叫王德順，係全世界最大年紀嘅模特兒，第一次行天橋係70、80歲。所以曾經有大陸粉絲話要去美國讀書，怕幾年之後見唔到我，我話我冇咁早，有排見。」