近排無綫節目《媽媽唔易造》成為好多女性觀眾熱話，個個媽媽谷都有討論，小編當然都有睇節目啦，不過唔知大家有冇同小編一樣，對個女主持好好奇，佢五官清秀但唔係藝人，之前見過佢做《我係小廚神3》評判，其實朱庭萱係咩人？新聞多數見到係「姚子羚閨密」、「黃宗澤前女友」等等，其實Bonnie年輕時跟黃宗澤拍過5個月拖，分手後仍然是好朋友，她跟圈中好多藝人都份屬好友，林峯、陳凱琳、龔嘉欣、姚子羚等，至於近日姚子羚被傳搭上有婦之夫事件，Bonnie都有挺身而出撐好姊妹。其實Bonnie係咩人，點解又突然搵佢主持呢個節目呢？
Bonnie為節目《媽媽唔易造》擔任主持。(圖片：朱庭萱IG )
節目中Bonnie訪問不少婦女難以成孕的個案。(圖片：朱庭萱IG )
Bonnie是姚子羚的好姊妹。(圖片：朱庭萱IG )
朱庭萱，又名「玻璃朱」，英文名Bonnie因而得名，佢原來係「金利豐證券」副總裁，但近年積極參與幕前工作，除咗上網寫Blog之外，仲係女廚神做埋煮食KOL，仲出埋食譜，可謂周身刀張張利，非常厲害。節目第一集其實有講到Bonnie同樣係高齡產婦，39歲先生囝囝，當時懷孕佗仔時發現子宮有3粒10幾厘米闊嘅子宮瘤。Bonnie接受《晴報》電話訪問時表示：「其實子宮瘤好大，有一定影響個胎，但幸好BB好識揀位著牀，避開啲瘤喺中間位置，最終順利懷孕同埋開刀生佢出嚟，開頭諗住剖腹生小朋友時，順便割埋啲瘤，但醫生怕我會失血過多。之後再檢查身體，發現啲瘤全部縮細晒，直情唔使做手術，所以我覺得好多女性面對子宮瘤嘅問題，其實唔一定乜都要割！
Keon今年5歲，由Bonnie一手一腳去照顧。(圖片：朱庭萱IG )
混血兒囝囝Keon今年5歲，跟Bonnie就如糖黐豆一樣甜蜜，經常以「I Love You」掛在嘴邊，有時候Keon會跟媽咪去入廚學煮嘢食，有時又會一齊去旅行，Bonnie在Keon2歲的時候跟前夫離婚，過單親媽媽的生活，她說：「當初同前夫真係相處唔到，好多拗撬，唔想小朋友喺一個父母成日唔開心嘅環境下長大，但我同前夫都有保持聯絡，佢會定期帶Keon出去玩。自己做單親媽媽，我覺得最重要一點係唔可以喺小朋友面前講前夫壞話，就算憎到佢死，都唔好唱衰佢，因為父母係一面鏡，如果做得唔好，小朋友會出現不安全感同內疚感。」她表示在小朋友面前，她跟前夫都會盡量保持友好關係，將對小朋友的傷害減到最低。她說：「我父母都係離咗婚，但佢哋仲係好好朋友，不時會見面或者去旅行，我哋都會一家人一齊飲茶。依家我小朋友完全冇印象我同前夫一齊生活嘅情況，反而因為依家我有男友，前夫又有女朋友，Keon就感覺自己有兩個大家庭一樣。」
Keon是混血寶寶，好靚仔呀！(圖片：朱庭萱IG )
Bonnie是李家鼎的徒弟，她由女廚神KOL搖身一變成為節目主持，最大原因是想與女性分享「過來人」經歷，她說：「我都係高齡產婦，好多香港人都面對遲婚、遲生育嘅問題，但市面上好少有呢類話題節目，所以就同監製編審一齊去傾去做呢個節目。我之前做過記者，做節目可以過吓主持癮，好開心，好多人話講我自己嘅篇幅比較少，但我覺得唔緊要，因為主角係班媽媽。節目拍得好好，我碌爆晒人情卡，請咗好多好朋友亮相，其實拍出嚟有300分鐘節目，但因為無綫時段關係，最終被逼剪剩100分鐘，如果節目多少少，可能好多感動故事會睇得順暢少少。」她表示現在仍有在股票證券公司上班，但大部分時間是湊小朋友，有多餘時間就去做KOL同開班教煮食，她說：「我冇打算將自己定型，咩都想試試，今次節目好希望畀所有準備做媽媽嘅朋友睇，得佢哋有個心理準備，其實唔係想嚇大家，只係講畀大家知有咩方法去幫助自己生小朋友，而生完之後點樣去處理情緒問題同婆媳問題，最重要係畀男士們睇，畀佢哋知道老婆喺屋企唔係好得閒冇嘢做，湊仔真係好辛苦，返工都有放學時間，做阿媽係24小時隨傳隨到。」
Bonnie跟不少圈中人相熟，經常都會聚會見面。(圖片：朱庭萱IG )
左起：姚子羚、蝦頭楊思敏、Bonnie和吳文忻老友鬼鬼。(圖片：朱庭萱IG )
Bonnie原本已經係女廚神，更向李家鼎師傅拜師。(圖片：朱庭萱IG )
Bonnie同林峯係契姊弟。(圖片：朱庭萱IG )