伍詠薇為蔡一傑獻出第一次

蔡一傑「One For You音樂會－多倫多站」昨晚開騷，傑仔與演唱會嘉賓伍詠薇（伍姑娘）一同抵達加拿大，在機場獲熱情歌迷接機，不但帶齊唱片和海報讓他們簽名留念，更有歌迷邀請他們到家中作客，不過傑仔和伍姑娘要趕往綵排而婉拒。傑仔說︰「每次嚟到多倫多開騷，都有好多華人捧場，仲熱鬧過唐人街，佢哋好熟我哋嘅歌，近年多咗外籍觀眾，佢哋會跟住唱我啲廣東歌，又會喺台下一齊跳，好high。今次係我第一個個人音樂會，特別排咗好多快歌，大家一齊跳餐飽。」

傑仔和伍姑娘抵埗後，綵排前特地到名勝尼亞加拉大瀑布，欣賞美麗景色。伍姑娘亦笑言為傑仔奉獻「第一次」︰度身訂造私人耳機。早前傑仔特地請專人上門，為伍姑娘倒模度耳訂造，令她十分感動，更承諾在唱歌多下苦工。