張景淳（Stanley）在處境劇集《愛回家之開心速遞》中飾演龔燁一角，跟熊若水（呂慧儀飾）飾演一對，角色上面，龔燁經常口花花，氹得公司的女同事心花放，但又私下盡他所能去幫助若水，令家庭觀眾睇到又愛又恨，不過兩人熒幕情侶檔的組合愈來愈受落，他們每每出席公開宣傳活動時，尖叫聲總是此起彼落。
詳盡訪問，請click入：
Stanley因為「龔燁」一角而人氣急升，接獲不少廣告邀約。（《晴報》圖片）
曹總神一般的對手？
在劇入面，曹總（劉一飛飾）同樣是傾慕若水，更動用銀彈攻勢打動芳心，Stanley笑言：「曹總某程度上係好強勁嘅對手，但我想講曹總同熊若水喺埋一齊個契機一定唔係愛情，一定係現實嘅嘢。好多女性靠自己努力生活，去到某個年紀都會覺得好攰好辛苦，好想有人照顧，呢個時候就唔單單係諗愛情同感情，因為女人可能好想放低責任抖抖，但現實係要維持生活、照顧屋企人，咁嘅層面上面，可能開始考慮曹總。」他笑言龔燁其實都應該是高薪一族，不過感情總是會面對好多風浪，如果面對經濟衰落、裁員、減薪等等，好難只選愛情飲水飽而不選麵包。
問到現實生活中有沒有輸過畀「曹總」般的對手？Stanley說：「呢一行入面見過好多同事，我都成日問點解咁多人嫁畀有錢佬、金融才俊？好多人都覺得只係為錢，但其實兩個人一齊唔可以單單係愛情。的確我同交往過嘅女仔唔多唔少都會幻想未來去傾結唔結婚，但點都會講到錢呢個問題，生小朋友唔係話鍾意你就生，點都會有穩定經濟先再諗，就算好愛、好錫對方都好，你講得出之前，你要可以承擔到先。」
「龔水戀」修成正果，搞到曹總不知幾傷心。(圖片：劉一飛IG）
「龔水戀」由以前不討好，到現時大受歡迎。（圖片：呂慧儀IG)
Stanley同呂慧儀老友鬼鬼，早前為對方挺身而出力斥負面指控。（圖片：呂慧儀IG )
不能接受不忠與出軌
呂慧儀的前夫黃文迪被拍到跟女仔在巴士上調情，呂慧儀後來宣布已經離婚一段時間，而傅嘉莉即時抽水留言講兩人往事，Stanley看不過眼公開指斥對方，他說：「將來如果我有女朋友或者老婆，一定忠於對方，當然呢個世代唔係傳統想法，結婚唔一定一生一世，因為每日價值觀都變緊，我覺得最重要係兩個人要同步，兩個唔同步就開始分歧，好容易分兩條路。離婚唔緊要，先有共識分開再去開展新生活，但不忠、出軌嘅事我冇辦法接受，結婚係一種承諾。」
Stanley認為對愛情不忠或者出軌，是不能接受。（《晴報》圖片）
張景淳是一個怎樣的男友？
「私底下我係一個點樣嘅男朋友？我係囉唆，一係唔出聲，一出聲就長篇大論去講、去分析件事，對女仔而言，無論你態度好或者唔好去講道理，佢哋都會覺得係鬧。」Stanley直認私下都係黐身膏藥，喜歡跟另一半形影不離，他說：「除咗工作以外嘅時間，我都選擇同另一半一齊，有少少重色輕友，咩都一齊做，就算我唔識，我都會學埋一齊做。將來做爸爸的話，我唔會要求好高，不過小朋友道德觀應該要好好去教，最重要佢開心成長，我仲係有童心嘅人，我知小朋友鍾意咩、唔鍾意咩，我細個得唔到嘅玩具，我盡量都會滿足佢，如果生女仔，唔使講，一定縱容佢，前世情人嘛！」
Stanley直認自己是囉唆又黐身嘅男朋友。（《晴報》圖片）(待續...)