現年50歲嘅邵傳勇離開咗TVB多年未喺香港嘅公仔箱出現，不過日前佢就出現喺由林建明（大姐明）與盧海鵬（鵬哥）主持嘅ViuTV節目《林盧去追星》。
邵傳勇2007年為咗同住喺上海嘅媽媽團圓而北上發展並定居上海，大姐明同鵬哥去到上海探呢個老友。
邵傳勇一盡地主之誼帶佢哋周圍去，仲親自下廚宴客。席間邵傳勇講到自己當年出道時嘅辛酸史。
當年佢拍第一部電影《貓頭鷹與小飛象》，第一日嘅第一場就同洪金寶有對手戲：「當時大哥拍戲追求真實感！」佢話數３聲就摑佢一巴，但摑咗３巴都係Take唔到滿意嘅鏡頭，之後大哥就同佢講：「𡃁仔，你頂住，我數到3打落去，你唔好畀反應呀！」之後洪金寶數到一嘅時候已經打落去，邵傳勇完全嚟唔切反應，結果撞咗落隔籬個人；結果3個人跌出鏡頭，邵傳勇亦足足休息咗3日先再開工。
含住金鎖匙出世
邵傳勇咁辛苦喺演藝圈由低做起，但原來佢嘅背景非常顯赫。邵傳勇曾為大戶人家之子，太公係上海著名的裁縫師，上海第一棉紗廠更曾由佢哋家族所擁有。此外，邵傳勇的婆婆為30、40年代著名電影明星──顧蘭君。
「貴公子」馬死落地行
然而，到咗邵傳勇爸爸一代家道中落，當時正喺英國讀書嘅邵傳勇由於支付唔到昂貴嘅學費而被逼回流返港，並開始其演藝生涯。邵傳勇與前香港電視廣播有限公司主席，人稱六叔嘅邵逸夫爵士，為同一家族、同一太公，但不同房。縱然二人係親戚，不過邵傳勇於TVB發展多年都冇要求邵逸夫幫忙，而且亦唔介意做綠葉，多年嚟默默耕耘。
一線之間險癱
1998年邵傳勇坐友人私家車喺清水灣遇上嚴重車禍，第二節頸椎斷裂0.1毫米的空隙，如果超過這個0.1毫米，直接傷害到呼吸系統，就會變成植物人，當時女友黎芷珊亦悉心照料，但二人於2000年左右分手。
黎芷珊
醫療失誤留下終身後遺
4年前邵傳勇仲經歷腦水腫，因為助理醫生斷錯症，打咗麻醉藥上埋手術台先知唔係有腫瘤而係一個大水泡壓迫到中樞神經，原本用微創就可以解決，但就被開顱，仲導致需要永久服藥，還留低了手震手痹嘅後遺症。
邵傳勇與同齡太太內地女藝人屠焱2013年於上海結婚，太太早年結過婚，同前夫有一個24歲女。邵傳勇就話自己同繼女好夾，唔介意結婚一拖二！屠焱雖然同邵傳勇同齡，不過就Keep得好好，有「上海童姥」之稱！
邵傳勇與太太屠焱
邵傳勇與太太屠焱
邵傳勇於北上發展開咗傳頌影業公司，仲同多年嘅好兄弟呂頌賢拍住上一齊投資食店，生活都似乎幾美滿。