現年39歲嘅藝人張美妮啱啱喺社交網宣布誕下B女，相中一家三口都瞇住眼，美妮抱住B女同老公鼻貼鼻，感覺超溫馨！美妮字裏行間都充滿愛，難掩興奮之情：「我們的寶貝女出世了！同大家介紹佢嘅乳名叫笑咪咪，因為佢一出世就成日都笑咪咪，連醫院啲姑娘都咁講吖！😆有佢喺度令到我同老公都感到非常喜悅、開心、溫馨，真係成日都笑咪咪吖！🥰😄😘乖女~Welcome to our family! We love you❤️❤️❤️」
美妮話本身已經定咗開刀日子，但就早咗一日作動，她說：「好在一早已經準備晒，作動咪入院囉！去到醫院護士都有問我諗住開刀定自己生，我話試吓先，想試吓個感覺，感受吓陣痛，不過當開到一度時，我已經頂唔順，最終都係開刀！」
美妮話B女出世時六磅幾，已出院返屋企三日，而「笑咪咪」都好乖及好配合，她說：「依家餵緊人奶，佢都好聽話，老公都好叻，喺醫院時我負責餵奶，佢就幫手掃風同換片，姑娘都讚佢叻。」美妮仲話老公KK見到前世情人都好冧：「佢同個女一樣，成日都笑咪咪囉！」
張美妮同圈外老公KK於2013年結婚，前年美妮仲話減少幕前演出造人，舊年12月終於宣布有喜！當時見美妮已經見肚，佢喺社交網宣布：「感恩上帝的恩典❤，我們家庭將會迎接新成員，我和老公要當爸爸媽媽啦！心情真係既開心又緊張，以滿滿的愛期待BB的來臨吖！」當時美妮已懷孕三個多月，話只得家人知道，忍口都忍得好辛苦。
美妮話大佢9年嘅老公都好開心：「開心到不得了，成家人都好開心，老公特別緊張，日日都好緊張，成日打畀我，又趕返屋企同我食飯，驚我亂食嘢！」
之後美妮係情人節宣布自己佗嘅係囡囡，未出世就受寵，非常爆笑：「老公知我收到粉紅色嘅花就會好開心🌸☺️love you~😘
但一向好少會送公仔俾我，我問佢點解今次會送公仔？佢話係等B女出世，個熊仔可以俾佢玩吖！😆難怪啲人話囡囡係爸爸嘅小情人！😆❤️」
美妮坦言最初懷孕時相當攰，又經常失眠，但一冇咁攰就會出去做吓運動！但佢就話冇孕吐，而且胃口仲好好呢！依家生咗個健健康康嘅B女，真係辛苦晒媽咪喇，希望囡囡大個都同媽媽一樣咁靚啦！