新晉男子組合MIRROR大受歡迎，特別係現年20歲嘅成員姜濤，一舉一動都備受「姜糖」（姜濤粉絲專稱）關注。早4月30日是姜濤20歲生日大日子，成班姜糖為搞偶像生日會，溫馨送蛋糕，氹得姜濤好開心。之後粉絲更包起銅鑼灣怡和街電車站幾個廣告位置，為姜濤賀壽，花巨額金錢落廣告換男神一笑。主力籌辦此事的姜糖更在Instagram發文，表達對姜濤的愛同祝福「喜歡台上的你，能歌善舞，魅力懾人 ；欣賞台下的你，謙卑誠懇， 天真瀾漫 ；掛念率真的你 ，一笑一顰，魂牽夢縈；唯願將來的你， 閃爍發亮，星途璀璨。」
(姜濤IG)
(粉絲包起銅鑼灣怡和街電車站幾個廣告位置，為姜濤賀壽)
粉絲對姜濤嘅生日祝福原來唔只咁少。近日姜濤接受訪問時稱，曾有粉絲喺新西蘭買咗塊地作為生日禮物畀佢，令佢非常震驚，「塊地唔係用作起樓，而係粉絲代我支持環保。有機會我都想去睇下塊地。我最開心係粉絲做善事，可以幫到有需要嘅人士。」
(姜濤IG)
今年年頭亦有姜糖於銅鑼灣港鐵站買燈箱廣告向姜濤示愛。廣告上款寫着「致愛：姜濤我們的超級冠軍」，下款則寫「潛水艇中的16粒姜糖」，並寫上愛的告白：「Because of you姜糖們都成了最得意的女孩，讓我們123說聲我愛你，陪着你走每個高山低谷，我們多喜歡你，你會知道。」而於地鐵落燈箱廣告的金額介乎4萬元至13萬元不等，視乎唔同位置同車站定價有所不同。
(姜糖銅鑼灣港鐵站燈箱廣告向姜濤示愛)
其實除咗姜濤粉絲花巨款支持心愛偶像，以下呢班明星嘅粉絲都好瘋狂，喺佢哋心中，為咗偶像，錢又算得乜嘢？
許靖韻（Angela）
許靖韻人稱「小背心」，近年佢在內地人氣愈來愈高，吸納唔少粉絲，今年生日更有歌迷在全國買下超過1,500個「豐巢」Led Mon廣告版，連續7日播放對Angela的生日祝福。
陳偉霆
內地「萬人迷」陳偉霆擁有大批大陸粉絲，試過在佢32歲生日時，有女皇（陳偉霆粉絲稱呼）在灣仔、金鐘及旺角等多個港鐵站的燈箱落廣告，向偶像賀壽，估計花費不菲。
TFBoys王俊凱
內地超人氣男子組合TFBoys成員王俊凱18歲生日時，粉絲為迎接偶像成年大日子，大灑金錢在世界各地賣廣告，規模可謂空前盛大。其中包括港鐵燈箱，而內地商場有5000塊巨型LED廣告板，美國荷里活則有噴射機在空中寫字祝賀。最誇張係有粉絲買下南緯60度的18顆星星的命名權，又計劃將偶像人形紙牌連同火箭，在美國內華達州發射上太空，為王俊凱慶生。
周杰倫
唔少天文愛好者發現小行星時，都會以社會著名人士，或者是自己偶像命名。曾經台灣高雄有四名天文發燒友共同發現一顆新小行星，佢哋都係周杰倫忠實粉絲，所以決定命名新小行星為「周杰倫星」 。