「我墮入羅莽你卻在網外看」、「條條大路通羅莽」、「自投羅莽」……羅莽呢一個咁特別嘅名經常畀網民攞嚟惡搞，究竟呢個係咪佢嘅真名嚟呢？原來羅莽原名叫羅坤霖，藝名「羅莽」係張徹導演幫佢改。張徹本來為羅莽取藝名「羅羽」，但羅莽多口問係咪廣東話嘅「落雨收柴」，張徹即刻面色一沉住，羅莽自覺講錯嘢，逃走時被冷氣機水管戟倒。張徹見到佢呢個魯莽舉動，於是最終將佢其藝名改做「羅莽」。
網民成日拎佢個名嚟惡搞，不過非常玩得嘅羅莽一啲都唔介意，仲自己笑自己添！羅莽喺5月嘅時候終於開咗自己嘅Facebook page，佢第一個有字Post就已經好爆笑：「一個「自投」（食字「自投羅莽」）的誕生！我，羅莽，今日開始，玩飛卜，收門生，大家跟唔跟我？跟就叫聲羅師父！」
Facebook收𡃁呢個舉動即引嚟大批網民回響，追蹤佢嘅人數不斷攀升，不過亦由於太Gag嘅關係，唔少網民都質疑到底個Page係咪佢本人開嘅呢？
日前羅莽終於聽到大家嘅聲音，拍片去證明呢個Facebook係自己真身，留言話：「各位網友，特拍此片，以證本網為本人羅莽個網，多多指教。另外，本人尚有一個拍照為主的哎之（IG）網。」
佢喺片中話：「各位網友，呢個網就係我嘅網喇，係堅㗎！多謝各位網友，加入我羅莽嘅網嘅網嘅世界，哈哈哈哈哈......」配合佢魔性嘅笑聲，教網民如何不愛他！
直到截稿前佢嘅Facebook Page開咗都唔夠一個月，但已經有16,489個人正在追蹤，羅莽魅力非同小可。
張徹導演冇幫佢改錯名，羅莽經常喺電視、電影中飾演戇直莽漢，而佢都做得入形入格。羅莽父親以前想佢當差，但羅莽一心想做武打明星，所以選擇從影。後來他於1977年獲得邵逸夫親自提拔，並將他引薦給導演張徹。
羅莽透過報紙廣告得知邵氏電影公司招收武打學員，加盟初為開拍電影《少林寺》而設嘅第一期邵氏武術訓練班，成為張徹契仔及訓練班八十位學員之一。入行初年喺狄龍主動鼓勵下，令佢決心喺演藝圈發展。
左一羅莽
電影《葉問2》飾羅師傅。
「小心呀 ,張枱好跣！」
羅莽早期轉演電視劇時多演警察，後期轉走搞笑路線。1984年於亞洲電視演出劇集《十二金牌》之後，1989年為咗更好嘅演藝事業，轉投無綫電視，1995年羅莽憑劇集《娛樂插班生》飾演「胡江」（吳剛）一角，受觀眾歡迎。1980年至1989年間更跟隨父親做沙泥生意。直至1989年生意結束後，就完全專注參與拍攝電影同劇集。
電視劇《城寨英雄》中飾果欄莽。
《洗冤錄》做戇直莽漢查小燦。
紅出國際
羅莽拍攝過嘅其中一部電影作品之中，《少林與武當》電影情節喺2003年被英國樂隊 The Chemical Brothers 透過電腦特技剪輯成單曲「Get yourself high」嘅音樂錄像。2007年9月，佢獲得美國 Phillywood Entertainment 第一屆「國際武術影業終身成就獎」，更分別獲當年的賓夕法尼亞州州長 Ed Rendell 及費城市長 John F. Street 頒發榮譽獎。返港後，無綫電視時任製作資源副總監樂易玲為佢舉行記者會宣布消息。
畀女圍！
港產Rambo！
十年髮妻血癌亡
羅莽曾經歷喪妻之痛，1979年羅莽與當時任職診所護士的妻子結婚，不過妻子已於1989年因血癌離世，至今都冇再婚。如今佢同子女嘅關係好疏離。