「獎賞錢」「易賞錢」合作 積分互換當錢用

黛安之前去百佳超市shopping，發現用滙豐卡找數，買滿500元即送50元coupon，非常着數！

優惠尚未結束，滙豐就與屈臣氏集團有新合作，噚日佢哋宣布推出全港首個積分互換計劃，滙豐信用卡及易賞錢用戶只要透過「滙豐Reward+」或「易賞錢」手機App撳幾個掣，可即時將滙豐「獎賞錢」兌換成「易賞錢」或調轉，將「易賞錢」兌換「獎賞錢」。滙豐香港區零售銀行及財富管理業務信用卡及私人貸款主管甘家儀同黛安講，今年銀行重點發展項目係擴闊獎賞錢嘅用途，而易賞錢擁有逾380萬會員，雙方合作可等市民享更多優惠。滙豐香港區零售銀行及財富管理業務主管Greg Hingston仲話，如果屋企小朋友要買手機，可即時將「獎賞錢」兌換「易賞錢」到豐澤選購，然後將積分當錢用！

黛安聽屈臣氏董事總經理黎啟明及易賞錢客戶體驗總監張欣欣介紹，每1蚊「獎賞錢」可兌50分「易賞錢」，每次兌換上限係1,000元「獎賞錢」或50,000分「易賞錢」。仲話，即日至8月31日用「獎賞錢」兌換「易賞錢」，可額外獲50%嘅「易賞錢」積分，每人最多享額外2,500分呀。