大家睇《白色強人》都會留意到，總是跟郭晉安作對的明成北醫院院長姜大衞 (John)，劇中張曦雯是John哥的女兒，偏偏愛上郭晉安，搞到關係好尷尬，事關安仔同John哥為醫療改革的事總是未能達成共識。劇中有張曦雯這位美女做女兒，現實生活中John哥和太太李琳琳結婚45年，育有兩個靚囡囡和一個囝囝，他們分別45歲、36歲和23歲，其中大女姜伊蘭2007年下嫁演員曹永廉，隨後育有一子一女，而二女姜依文在加拿大生活，孻仔姜卓文在兩公婆高齡時老來得子，一家人都幸福滿瀉。
John哥與家人關係親密，經常都會一齊食飯。（圖片：姜卓文IG )
John哥今年快將72歲，仍然活躍在幕前演出，《白色強人》正在播映，而他又已經開拍新劇《網絡騙案》，工作忙過不停，武師出身的John哥雖然近年都已經主力在文戲方面的發展，但他表示：「拍劇不辛苦，自己接劇最重要是視乎劇本，最重要是知道劇中戲份是否有機會可以發揮，如果只是走來走去的，當然不會接。我從影以來，從來都冇講過拍劇辛苦，就算開套武打戲畀我，我覺得我都仲可以打。（仔女心痛？）唔只家人，好多工作人員都會心痛，個個叫我唔好咁辛苦，我都話唔辛苦，除非我唔鍾意呢一行。只要你鍾意，你就唔會覺得辛苦。」
姜大衞在《白色強人》中跟郭晉安作對。（《晴報》圖片）
他直言只要是鍾意的工作，從來不會嫌辛苦。(《晴報》圖片)
一年一度的父親節是爸爸在家庭中成為主角的日子，John哥表示：「沒有計畫，如果仔女為我慶祝，我就扮吓驚喜，我哋一家人唔太注重呢啲，反而結婚周年紀念就會比較重視，父親節、母親節都係由班細路安排，真係唔知佢哋點搞，冇乜所謂！」正所謂孻仔孻心肝，難得老來得子，會否偏心錫晒細John呢？John哥說：「冇，我個個都唔錫，因為當下我最重要係工作，屋企有老婆睇住，仔女由老婆去錫，我就做一個嚴父，不過我唔會鬧仔女，我淨係個惡樣都夠嚇怕佢哋。」他直言因為一直拍劇工作，未有好好陪伴幾位子女的成長，幸好他們慢慢長大都體會和明白為人父親的難處。
姜卓文是兩公婆老來得子，定必寵愛有加。(圖片：姜卓文IG )
之前一直有傳孻仔姜卓文打算入行，John哥說：「係，佢都睇緊自己要做咩，佢係想入行，不過呢行唔係話入就入，希望有機會啦！(你會暗中幫手？）有機會都會，希望佢自己知道咩事，我會做個榜樣畀佢睇。」囝囝姜卓文今年只有23歲，身形高大、皮膚白滑加上眼細細，甚有韓星風範，他剛剛修讀完薩凡納藝術設計大學（SCAD）的課程，熱愛音樂識得以結他自彈自唱，又會經常打拳和健身，可謂動靜皆宜。以往一直有傳姜卓文打算跟隨爸爸的步伐入行，但一直只聞樓梯響，直至近日ViuTV公布《全民造星II》的參選名單，見到姜卓文以「細John」稱號參選，似乎誓要成為第二位姜濤。他在個人Instagram都上載自己參選的宣傳照，並呼籲大家多多投票支持他。John哥雖然口硬話入行唔容易，但他暗地裡對囝囝非常支持，他說：「當然自己個仔，我當然覺得佢有才華有才能，但唔係我講就算，留待出面班觀眾話事，呢一行並唔係咁簡單。」
姜卓文修讀薩凡納藝術設計大學（SCAD）課程畢業，父母都有出席他的畢業禮。(圖片：姜卓文IG )
姜卓文加入《全民造星II》，有望成為第二位姜濤。（圖片：ViuTV)
另外，細John在社交平台都大方分享他跟女友的照片，兩人不時在鏡頭曬恩愛，打破人氣偶像唔可以拍拖嘅定律，事關現時投票情況所見，細John的心心已早達588個，走勢凌厲！
細John大方在社交平台分享跟女朋友的合照，未有偶像包袱。（圖片：姜卓文IG)