父親節專訪「熒幕下的好爸爸」第四位訪問到張達倫，他近日在《白色強人》劇集入面飾演醫院發展局主席溫銘章，而太太則是女主播康橋（朱智賢飾），他為了通過醫務改革方案，不惜出動多方的游說工作，頭幾集都有不少戲份。而現實生活中，張達倫在2004年畢業於第十九期無綫電視藝員訓練班而入行，早前在《愛‧回家》的「嚴謹」角色為人所熟悉，而快將播放的新劇《好日子》，將會出演第二男主角齊萬碩，意外地跟囝囝「碩碩」撞名。
張達倫在《白色強人》入面飾演醫院發展局主席。(圖片：《白色強人》電視截圖)
張達倫同太太Kimmy在2016年結婚，連同Kimmy跟前夫所生的繼女Chloe一齊照顧，而婚後他們再育有一子張凱碩（勁揪雞），一家四口非常幸福。達倫做繼父又做爸爸，他曾經在節目中表示：「我永遠都當Chloe係自己個女，我唔覺得有咩大問題，我都係一樣咁錫佢。因為Chloe係Kimmy生命入面嘅一部分，如果我接受唔到，我有咩資格愛呢個女人呢？」能夠跟繼女好好相處，建立朋友的關係，難怪達倫被大家封為暖男，達倫表示：「做爸爸真係好開心，我仲想追多個女，如果有個簽約講明係女就正喇！因為囝囝太多能量，好似唔識停咁，體力又好，女仔可能會文靜少少。」
張達倫一家人非常幸福。(圖片：張達倫IG）
一家人穿上和服，非常可愛。(圖片：《1+1+1》電視截圖)
張達倫一家三口喜迎勁揪雞這位小兒子。(圖片：《1+1+1》電視截圖)
他直言囝囝勁揪雞出世後，自己的生活變得不再一樣，他說：「開劇就會開始忙，比較少時間陪小朋友，不過咁樣反而雙方都更加珍惜。有時候唔見幾日，發現佢又講多咗句說話，隔幾日又識做多樣動作，感覺每次見都好新鮮。之前有工作出門，個仔竟然拉實我狂喊唔畀我走，搞到我真係唔想出門。所以依家我出門口唔會偷偷閃走，反而同佢解釋，話爸爸要返工，錫幾啖先出門，滿足自己又滿足佢，小朋友暫時唔見到你，以為你出去一陣，佢哋唔覺得原來已經係幾日。」
張達倫陪囝囝一齊玩波波池。（圖片：張達倫IG)
張達倫同太太Kimmy經常帶勁揪雞一齊出席活動。（圖片：張達倫IG）
張達倫笑稱在家中地位低微，跟傭人差不多，他直言父親節的最佳禮物就是陪伴，他希望可以陪伴子女一齊去玩，可惜囡囡要考試，未必理會他，達倫說：「幸好家姐好錫細佬，佢哋年紀相差太遠，又唔一齊住，不過佢每個月都定時會返嚟睡，細佬有時就會入房搵家姐，感情好好。」
勁揪雞愈來愈大個仔，係時候做哥哥，張達倫同太太講明想追個女，加油！(圖片：張達倫IG）