喜迎首個父親節 展鵬帶「小豬比」連趕3場

陳展鵬剛於今年四月榮升爸爸，本周日即將迎來他的首個父親節。展鵬預計當日連趕三場慶祝，問到老婆單文柔可會送多個B製造驚喜？展鵬笑言︰「咁真係又驚又喜。」

陳展鵬昨日以大使身份與仁濟醫院義工團隊，齊到荃灣石圍角邨向長者派發愛心福袋。今年四月太太單文柔為他誕下女兒陳羽媃（小豬比），初為人父的他如何慶祝父親節？展鵬透露當日行程，先跟外父慶祝，再與自己爸爸吃飯，輪到自己慶祝已經是甜品時間，他笑言︰「囡囡仲細，都未知道我係佢爸爸。（太太喺父親節送多一胎畀驚喜你？）咁真係又驚又喜，唔使咁快，生完兩個月未得住。」

展鵬自言升呢父親後，身份和心態都改變，使工作更有目標和衝勁，並會為女兒的將來設想。展鵬提起「小豬比」即流露一臉父愛，他大爆女兒的樣子一直在變，出世至今主力吃和睡，「最近開始睇到佢嘅性格，好似飲奶同有便便嘅反應，佢見到我哋時會呆幾秒，好似認得人，之後就會笑，間中好似想同我講嘢咁，會講BB話。」

單文柔現時全職照顧女兒，問展鵬會否禁止老婆工作，他否認說︰「唔會唔畀，唔好因為有小朋友而改變，想做就去做，最緊要舒服。」

撰文︰倪小珊

編輯︰陳禮恒

美術︰梁政敏