立法會原定昨日就《逃犯條例》修訂二讀，激發不少巿民響應罷工罷巿罷課，到金鐘政總外示威反對修例，最後跟警察發生流血衝突，唔少藝人都好關注事態發展。
阮兆祥撐警清場
阮兆祥昨日被問到對條例嘅睇法時表示：「有啲(內容)支持有啲(內容)反對。當然清場係應該嘅，因為始終可能會破壞到某啲香港人生活，我支持佢哋用一個比較溫和理性嘅方式去對待呢件事情，兩面都係我覺得，我期待住一個好嘅成果，我諗無論企喺邊一方，身為香港人都係愛香港，希望香港係好嘅，希望兩面都能夠互相體諒。」
成龍台北出碟唔知咩事
成龍昨日於台北舉行新專輯「我還是成龍」發布記者會並獻唱。會上被問到對香港「反送中」遊行相關問題時，成龍表示:「昨天才知道香港有一個大遊行，我都不知道是甚麼事情。」
周杰倫之後喺ig post同成龍嘅合照，引嚟粉絲幾乎一面倒狂插！
森美大感觸
{{hket:inline-image name="98.JPG"}}{{/hket:inline-image}}
森美於昨日凌晨時分喺IG上貼出林憶蓮主唱《願》歌詞，唔少網民都紛紛留言「心照」，而喺尋日嘅電台節目《早霸王》中，身為主持嘅森美用上半個多小時為香港人打氣，期間他提到自己有留言11號晚嘅直播:「我覺得最緊要係大家唔好用晒energy，大家都知道呢個係持久戰，戰字嘅意思係個賽事比較長，希望大家放鬆少少慢慢嚟。」
森美之後提到自己身邊有唔少身任政府要職嘅朋友:「同佢哋傾開先發現原來佢哋都有出去（遊行），問點解嗰陣，佢哋嘅答案比我覺得，香港人呢段時間個心對將來無希望嘅感覺，佢哋全部都係有家室嘅人，其中一個話『行埋今次可能無得再行啦』，呢個心態好似係香港人真係感到好絕望。」
森美表示自己對政治唔多認識，故以生活作為例子：「身邊有啲朋友嘅老闆好得意，佢哋好鍾意用一啲藉口去叫下屬跟做一樣嘢，而呢個藉口點都唔會係favour，但因為佢有原因嘅關係你就要聽。好多人都話離開香港，但我唔覺得離開係真正選擇，因為我唔見得呢個世界，係有一個地方可以無任何問題發生、令人安居。我個人比較正面，即係如果可以修補就去補，就算你係植物人我都會同你講……將來嘅日子仲有幾多次要同……植物人傾偈呢？當植物人要決定時，議會入面又有幾多代表到你嘅人呢？我哋而家可以做嘅嘢，係每一次投票選舉時，投選代表到你嘅人入議會先係最緊要，我今日唔會彈性返工，我返工係因為我想講我嘅說話，好過我喺屋企，香港人努力。」
森美（左一）係節目中唯一一個家長。
森美今晨在《早霸王》開咪指在新聞片段中見到昨日在金鐘現場前線的學生，與警方對峙、發生衝突、被攻擊等畫面，心中百感交集：「作為父母於過去日子都會掙扎，會問自己係咪做得唔夠好。」未知是否想到家中的一對子女，森美更講到哽咽：「做父母應該要反省一下自己做得好定唔好。」森美讀出聽眾在Facebook的留言，有人大讚企喺前線嘅年輕人好勇敢、一定有好嘅將來。
小儀覺得心驚
另一主持小儀憶述，於6月10日凌晨時分，在灣仔道街頭已經開始見到有市民聚集，見到氣氛緊張小儀覺得心驚：「平時睇住電視有乜發生，但當時係街上睇住大家，見識到大家嘅慌忙、慌張，同平日感受到的平安香港不一樣，一下子唔同晒。」
小儀
今日節目第一首播嘅歌係黃耀明《你真偉大》，之後係新青年理髮廳《這個家》、RubberBand《睜開眼》、Beyond《和平與愛》、陳奕迅《單車》、陳冠希《香港地》、謝安琪《山林道》等廣東歌。