「民以食為天」，每區都總會有一條食街，今次就帶你到筲箕灣有名的食街「東大街」。這裏勝在稍離鬧市，住宅林立，美食價錢自然較相宜。無論想試試特色的熱食壽司，還是地道的人情味泰菜，或是一嘗名廚主理的車仔麵，東大街都能滿足到你。
1.$98 魚子醬龍蝦牛油果意粉套餐【Sushi Men x Oyster Men】
這間西日混合菜的餐廳以生蠔和自創卷物作賣點，老闆之一Vincent擁有10多年製作日式料理的經驗，自創熱食壽司「壽司熱狗」成為店舖的招牌菜之一，「我見客人食多咗生冷嘅食物都想食啲熱嘅嘢暖肚。靈感取自日式炸飯團，但改將餡料鋪滿喺飯面上，啲餡料就唔會喺炸嘅過程爆哂出嚟。」
店內供應的魚生全部來自日本，店主推薦「大件夾抵食」的北海魚生飯，「呢個飯啲魚生全部嚟自日本，有北海道牡丹蝦等5樣刺身，咁嘅價錢食到咁多款刺身，所以好多客人都揀。」而餐廳另一個招牌--生蠔，店主強調這裏供應的生蠔直接洽商自法國蠔場，再空運到港，確保品質之餘，亦以最相宜的價錢購入，因此客人可以用更抵的價格品嘗。
Sushi Men x Oyster Men
地址：筲箕灣東大街2號麗東海景豪苑1座地下2號舖
電話：2388 0022
營業時間：星期一及三至日，12nn-3pm、5pm-12mn；星期二休息
2.$55 椰汁蛋香糯米飯【沙坦尼阿來】
這間小店今年4月底才開業，「沙坦尼阿來」是泰文音譯，意思是「美味站」。餐廳由Mark、他的泰裔太太Miu及他弟弟Nero共同經營，選址筲箕灣，只因他們都住在附近。店內上上下下共有7、8人，班底除了Mark兩兄弟，全部都是泰國人，「廚房出單都要用泰文㗎！」Mark笑說。廚房由Miu主理，她任廚10多年，其他的拍檔都是與她相識了10多年的朋友。
「一開始係朋友上嚟屋企食飯，次次老婆煮泰國嘢，佢哋都話好食，就話不如開舖啦！我細佬又係做飲食嘅，加上Miu又有好多廚師朋友，就開咗呢間舖啦！」既然主廚是泰國人，菜式自然正宗又地道，像鹹蛋木瓜沙律、椰汁蛋香糯米飯，Miu笑着告訴我們，這些是泰國很「興」的菜式與食法。大部分材料，特別是香料如金不換、香茅等，都是由泰國入口。連甜品都是由他們自己製，並非叫貨，十分有心機。
沙坦尼阿來
地址：筲箕灣東大街42-52號金來大廈地下L號舖
電話：2799 2660
營業時間：星期一及三至日，11:30am-3pm及6pm-11:30pm；星期二休息
3.$28 黑白孖芝土匪雞翼【九哥車仔麵．麻辣燙】
名人私房菜「御進」名廚鍾志強師傅，夥拍「富臨飯店」當了8年廚師的鄧國聰（九哥），以及幾位資深中菜師傅，在東大街開了這間車仔麵店。燜慣高級鮑魚，何以開店賣雜碎麵？「呢個係兒時回憶，以前不時企街邊篤魚蛋、食車仔麵，呢種香港地道街頭小食風味係歷久不衰。我哋唔係純粹玩回憶咁浪漫，係好認真去做車仔麵。」
九哥每朝8點回舖開始熬湯，真材實料，「落足豬骨、雞、金華火腿、牛骨、蝦米及陳皮熬至少3、4個鐘，金華火腿用最靚肘子位，加入牛骨令湯味更濃。湯底賣完就算，唔會再加水去煲，唔想靚湯變唔靚。」他們也很細心，為素食者特設番茄南瓜湯，用大量材料熬製，即使沒加肉類亦十分鮮甜。「真係不計成本，乜嘢都要新鮮，唔係唔想賺錢，但維持好品質係點都要堅持！」
九哥車仔麵．麻辣燙
地址：筲箕灣東大街4-10號東寶大廈3A舖
電話：2555 8819
營業時間：星期一至日，11am-9pm
撰文︰王寶欣、陳麗娜
攝影（部分）︰Benny
插畫︰何樂
編輯︰余運慶
美術︰梁政敏