藝人顏仟汶與詹秉熙過從甚密,二人多次被拍到密會照片,早前更傳詹秉熙離婚,但事件遭到男方否認的同時,顏仟汶亦表示受到詹太的電話騷擾,指佢「大眾坑渠」,顏仟汶發聲明與詹秉熙絕交,當時詹秉熙只回應稱:「屋企嘢冇回應!」而詹太一直未有表態,只在社交網留言:「原諒很容易,再去相信很難!」
詹秉熙facebook
事件過去個幾星期,詹太日前指離婚問題已交畀律師處理,並話請顔小姐(顏仟汶)唔好搞小動作,仲話佢要搶人老公,要拆散人家庭,已成功了。請對方畀佢安靜地生活。
上年6月詹秉熙仲曬全家福為婚變「辟謠」。(詹秉熙facebook)
詹秉熙昨日終於為婚變作出回應,表示同太太現正處理離婚事宜同細節,並已交由律師處理中。佢指同太太大約三年前,已經開始各自分房瞓,但因為小朋友關係,一直冇去處理問題。佢話佢哋離婚同任何人無關。
但詹秉熙話二人三年前已經開始分房瞓。(詹秉熙facebook)
顏仟汶表示發「絕交」聲明後已冇聯絡詹秉熙夫婦,自己係從新聞得知佢哋離婚,被鬧搶人老公佢自己單身,冇同任何人一齊:「做呢行冇辦法,食得鹹魚抵得渴,澄清唔到咁多。」佢話出聲明之後已經放低晒,誰對誰錯唔重要。被問到詹秉熙離咗婚有冇得做番朋友,佢話:「唔關事,做朋友都有底線。」
顏仟汶與詹秉熙年前上契,但舊年5月傳出二人「契出新關係」。
顏仟汶指依家係空白期,希望工作為先:「我咁嘅年紀,做嘢先最實際,以前就係太不切實際,依家想追番自己生活。」佢話依家想生BB,但呢個階段應該冇乜可能咁話。
事後亦冇避諱經常出雙入對。(顏仟汶facebook)