阮兆祥大爆肥媽死穴

阮兆祥日前與肥媽（Maria Cordero）、黎耀祥及李麗霞（黑妹）到馬來西亞雲頂舉行演唱會，四人在台上妙語連珠，引來全場爆笑；而平時聲大大的肥媽更被阮兆祥踢爆「死穴」，場面惹笑。

阮兆祥六月初與肥媽、黎耀祥及黑妹組成「媽妹祥祥」，到大馬舉行演唱會。四人施展渾身解數，先後以「逆齡俏學生」及「情歌王子」等造型亮相，唱盡70至90年代英文經典金曲及電視劇主題曲，令逾5,000位觀眾熱血沸騰，四人更親民地走落台與觀眾握手兼被集郵，將現場氣氛推向高峰。

四人加埋超過200歲，為何突然興起挑戰做超齡學生？阮兆祥笑言︰「我同黎耀祥都係飾演番自己，反而肥媽同黑妹姐嘅學生妹造型真係令我哋眼前一亮，辣到不得了，可以話係Spicy Ladies！」

超齡學生妹似Spicy Ladies

愈講愈興奮的祥仔，更大爆肥媽「死穴」︰「肥媽平時大大聲，好似乜都唔怕，其實佢有樣嘢好怕嘅，唔係佢老公，而係榴槤呀！今次有朋友拎咗啲貓山王嚟同我哋打氣，肥媽一聽到榴槤兩個字即刻走夾唔唞，真係畀佢笑死。」

祥仔又踢爆肥媽的老公亦有隨行，並大爆「教女人最緊要姣」的肥媽，私底下對老公都相當「姣」，十分搞笑。

撰文︰倪小珊

編輯︰黃寶恩

美術︰梁政敏