海洋公園國際STEAM保育大賽 宣揚海洋環保意識

STEAM係近年教育相當着重嘅一環，鼓勵學生除學科之外，都要多啲實踐！黛安知道海洋公園早前主辦咗「第一屆海洋公園國際STEAM保育大賽」，邀請世界各地學生為解決環保議題提交具創意嘅計劃書，唔少香港中學生都好有諗頭，分別設計出機械垃圾魚、魚類作為第一身視覺嘅VR影片等。

黛安知道，今次海洋公園呢個大賽特別用咗「STEAM與海洋保育」做比賽主題，畀參賽學生可從「行動」、「宣傳」同「公眾意識」3個題目中選取1項嚟參賽，透過科技或創作藝術等方式，解決或向公眾推廣海洋減廢或保育生物多樣性嘅意識。

公關姊妹話，唔少本港參賽作品都好出色，例如基督教宣道會宣基中學嘅「清理海洋廢物的垃圾魚」就奪得「STEAM行動項目最佳創意獎」，有份參賽嘅中四同學張芷瑜話，幾個月前與同學到龍蝦灣視察，發現當地滿布塑膠，於是構思以紅外綫感應技術研發垃圾魚，喺水底收集垃圾，避免海洋生物誤吞垃圾而死亡。

佢哋仲好聰明將相機化成「魚眼」，用作觀察海洋生物嘅習性同特性，兼收集數據進行科學研究。而魚尾擺動或發出電波時，就可連接無綫遙控，當垃圾魚盛載垃圾量飽和，就會自動「游返」資源中心，研究員就會將垃圾回收和再造，回收後嘅垃圾就會轉化為飼料，供海洋生物進食。

宣基嘅同學冀日後將20至30條垃圾魚放喺熱門海灘，為海洋保育出一分力！

另外，明愛粉嶺陳震夏中學就透過喺魚缸拍攝嘅虛擬實境（VR）影片，以魚類第一身視覺，呈現珊瑚白化、小魚被大漁網捕捉等情況，藉此推廣環保理念，仲成功奪得公眾意識項目冠軍。