《2019香港小姐競選》今日喺TVB電視城進行首輪面試，143個報咗名嘅參加者已經去到現場，當中有北方過嚟嘅大媽、有氣質滿滿嘅女神、有人氣爆登嘅網紅，亦有人早已經入行做主持鋪好晒路。睇完佢哋啲相，可能大家都唔係好知佢哋邊個打邊個，以下將會抽幾個最特別嘅參加者出嚟進行大．起．底！
湯洛晴
呢位湯洛晴芳齡26歲，英文名為Carmaney Santiago，原名黃嘉雯，同湯洛雯一啲關係都冇。佢畢業於香港浸會大學人文學系，喺讀書期間已經成日周遊列國，如瑞士、冰島、法國、意大利、希臘等地，仲影咗唔少靚相，連大學畢業後都揀去羅馬尼亞做義工，愛心爆棚。擁有32C上圍及172cm身高嘅湯洛晴外形一流，由2013年起佢已經出道做模特兒，拍過唔少品牌廣告，有飲食集團、啤酒、港鐵等，同過金像獎影帝古天樂、TVB藝人張國強合作，亦有參與綜藝節目如香港電視《工作假期》、有線電視《為食情報局》等。舊年，湯洛晴曾代表香港去日本東京參加《國際小姐2018》，今年參加港姐被視為大熱門。
(東星娛樂)
蔡嘉欣
蔡嘉欣芳齡25歲，畢業於理工大學紡織及製衣系，身兼YouTuber、韓裝店老闆、美甲店老闆、藝人，年紀輕輕YouTube Channel就有14萬訂閱人數，而instagram都擁有過10萬粉絲，係個網紅。唔單只咁，佢2017年更開始涉足娛樂圈，曾經為ViuTV主持一連43集嘅節目《Trip精》，亦拍攝過《#返鄉下》。原來蔡嘉欣15歲時已被星探發掘入行，第1年已經賺咗10萬蚊收入；18歲就賣韓國衫，同時簽約StarzPeople模特兒公司，參選過 2012年FACE UStar校花校草選舉；20歲開網上時裝店，喺大陸入貨；23歲就做美甲師，連佢自己都話：「返學每日遲到早退，可以順利畢業，我都覺得好神奇！
(東星娛樂)
梁靖嵐
梁靖嵐芳齡18歲，英文名Eleanor，媽咪係香港人，爸爸係英國人，係個中英混血兒。曾經喺悉尼讀書之後返香港，做過模特兒，睇返佢instagram都好玩得，同鬼妹朋友好fd影相。
(東星娛樂)
陳熙蕊
陳熙蕊芳齡25歲，身高163cm，體重43kg，英文名Blossom，做緊美容顧問，Instagram唔少同男朋友嘅啜啜sweet相。佢好鍾意唱歌、跳舞、表演，2017年曾參加過澳洲華裔小姐競選 (布里斯班賽區) ，今年又有參加「中國好聲音」分數排第4，得到最具潛力獎同優異獎。
(東星娛樂)
Katy Yeung
Katy Yeung，身高178cm，只得42kg，身材平均但唔突出。
(東星娛樂)
麥淑螢
麥淑螢，英文名Mary Mak，喺香港大學金融經濟系畢業，曾組女子組合HongKongirls（HKG）擔正做網上電影《5個女孩2個爸》女主角，分別飾演王維德同麥德羅嘅5個女，之後喺新亞視擔任娛樂主播。
(東星娛樂)
彭美詩
彭美詩芳齡26歲，英文名Mercedes Pair，係中國、德國、西班牙混血兒，做過模特兒，曾多次出國選美，係Momo Casting Talent School嘅catwalk導師。早前佢選過ViuTV選美節目《美選D.n.A》但退選，跟住就參加咗世界旅遊小姐，去到日本比賽攞咗香港區冠軍，被日本模特兒經理人公司簽咗。彭美詩喺日本幾有人氣，唔單只成為日本健康食品代言人，拍咗一個美容微電影，仲上咗Model Press TV做直播嘉賓。今年佢再代表香港前往柬埔寨參選「Miss World Noble Queen International 2018（2018 世界華貴小姐 ）」，成為首位出戰該國際競賽嘅香港代表，最後憑語言能力同淡定表現擊敗荷蘭和格魯吉亞佳麗，勇奪總決賽冠軍，為港人爭光！
(東星娛樂)
Mina yeung
Mina yeung芳齡25歲，做過空中小姐，自稱係Freelance歌手、舞蹈員、網紅，Instagram粉絲有1萬5。曾經參加過2014年FACE UStar校花校草選舉，今次參加港姐可以1分鐘做到20個表情動作，原來係馮盈盈港大營養學同學，盈盈畀tips：「平常心」。
(東星娛樂)
黃雍祺
黃雍祺芳齡20歲，係美國留學生，就讀喬治華盛頓大學外交學院國際關係科二年級。因為學校位喺白宮旁邊，曾經見過美國總統特朗普，今次參選媽咪特登陪佢去。
(東星娛樂)