【聲明】港生活網站並無進行電話推廣活動

去惠康shopping兼換印花

發佈時間: 2019/06/28

非常受歡迎嘅《反斗奇兵4》,即將喺下個月11日上映。想呢班由細陪到你大嘅玩具朋友陪埋你返屋企,好簡單,只要去惠康買嘢咪得囉。惠康公關姊妹話,喺上映當日會推出4款實用特別版家品畀大家換購,款款都用上反斗奇兵經典角色做主題,保證啱你心意。只要喺9月26日前每購物滿60蚊,就可以換到1個「笑印」,儲到指定數量「笑印」就可以換啦。

黛安最鍾意就係「反斗奇兵多士爐」,咪睇烤多士咁簡單,裏面嘅特製模版可烤出胡迪嘅星星徽章,同牧羊女「寶貝」嘅蝴蝶結,而且有5段烘烤設定,無論造型定係脆度都一定係令人最滿意嘅多士;只要儲夠220個「笑印」就可免費換領,或者儲110個「笑印」再加179.9蚊就可到手,限量5,000件,想換就要快啲儲啦。

另一款推介反斗家品,當然係三眼仔迷你雪櫃啦,啱晒夏天係office用,保證時刻有冰凍飲品飲,到咗冬天仲可用嚟加熱,想飲暖笠笠飲品都夠窩心。同埋呢個小雪櫃仲支援車用電流,帶埋去戶外朋友聚會,肯定勁受歡迎。而家只需380個「笑印」就免費換到,儲190個「笑印」加329.9蚊一樣可以攞返屋企,限量6,000件咋。

除咗家品,女士同小朋友最鍾意嘅公仔依家都有得換啦,除咗反斗奇兵,其他喺彼思動畫登場嘅經典角色,好似毛毛、大眼仔、Mo仔、多莉等8個角色都有得揀,只要60個「笑印」就免費換到了。

撰文: 黛安 消息特靈八卦公關
欄名: 八卦名利場