賭王何鴻燊四房太太梁安琪的兒子何猷君, 早前宣布同女友奚夢瑤結婚, 奚夢瑤係內地模特兒, 所以身高一定係有返咁上下, 大概有178cm。而猷君據聞身高只有165cm, 兩人就好似「孖寶兄弟」入面嘅Mario同碧姬公主一樣, 都係「女高男矮」。一般男人揀伴侶都會想揀啲比自己矮嘅女人, 不過有時緣份好難講, 有啲男人偏偏就係愛上咗生得比自己高嘅女人... 雖然命運嘅安排無辦法因應人擇偶嘅原則而改變, 不過亦有其他方法可以平衡一下心理。
近日, 何猷君同老婆奚夢瑤齊齊喺微博發布佢哋嘅結婚證照，兩人笑容甜蜜, 仲撰文大讚對方有眼光。雖然「女高男矮」對佢哋嚟講已成事實, 但係喺呢輯結婚相，睇到何猷君終於可以高返一次。不過身高都唔係重點, 最重要係猷君同夢瑤嘅愛係情比金堅。
(何猷君微博)
(奚夢瑤微博)
「娶高妹」婚姻普遍較美滿？
喺愛情中, 「年齡不是問題，身高不是距離」, 只要大家係情投意合就得啦！喺圈中, 亦有唔少「女高男矮」嘅夫妻, 而且佢哋婚後嘅生活普遍都幾美滿。以王祖藍同李亞男為例, 李亞男身高有180cm, 而祖藍身高有163cm。亞男曾接受內地節目《時尚生活》嘅訪問表示, 自己年輕時係鍾意「高大帥」類型嘅男人, 好似典型嘅白馬王子咁, 例如黎明或王力宏等。但後來佢又覺得外表唔係最重要, 最重要係對方有愛心、又孝順就夠。結果, 兩人因為欣賞對方內心而結合, 喺2015年正式拉埋天窗, 今年1月, 佢哋仲生埋B女, 一家三口好温馨。雖然兩人經常因工作聚少離多，但兩公婆依然好恩愛，仲不時會喺網上公開傳情。李亞男婚後亦曾甜蜜表示：「是你陪我一起把童話世界的愛情變成了現實，謝謝你，我的青蛙王子。」, 睇嚟兩人嘅婚姻生活都非常美滿。
(李亞男ig@therivergirl)
(李亞男ig@therivergirl)
甄子丹同汪詩詩年齡相差18歲，兩人認識咗四日就正式拍拖，三個月後仲結埋婚！詩詩身高有181cm，有樣有氣質, 係一位模特兒 ; 甄子丹雖然個子唔算高, 不過功夫就好了得, 佢仲被喻為係「宇宙最強」嘅武打巨星。子丹好愛錫老婆, 佢曾經喺某一年嘅情人節, 特意為老婆親自下廚, 整咗個愛心情人節套餐, 有焗生蠔、龍蝦、煎露荀配蕃茄仔，仲有煎西冷牛排、焗香菇, 每道菜都係一手一腳自己做, 落足晒心機。子丹呢份心機似乎冇白費, 睇見佢老婆個冧樣, 就知佢幾滿意呢個老公啦!
(甄子丹ig@donnieyenofficial)
甄子丹今年為老婆準備嘅生日蛋糕大到呢...(甄子丹ig@donnieyenofficial)