歎招牌美食兼玩專業賽事 大快活電競館登陸E-Max

去大快活吃飯可以玩埋電競？黛安收到風，知道由九龍電競館與大快活聯手打造嘅全港首間電競快餐綜合館「大快活電競」，今個月正式喺九龍灣國際展貿中心E-Max開幕喇！館內綜合咗電競、串流直播同內容分享等，夠晒多元化。

「大快活電競」佔地1.3萬呎，設有6大區域，包括用餐區和相連嘅主舞台設有10台電競對戰電腦及設置配備，可以進行5對5嘅電競賽事；而「競吧」就係區內罕有營業至午夜12點嘅酒吧，佢哋會提供6款本地手工啤酒，等大家可以開懷暢飲；電競區就設有25台專業電競對戰電腦，玩家可以坐喺電競椅上舒舒服服邊食邊玩；直播區則配備專業自助直播設備，一眾直播KOL可以獨立或相約進行直播；多用途房間仲可以容納超過50人嘅活動，包括舉辦藝術展覽、產品發布會甚至生日Party。

黛安知道，綜合館會由早上7點半至晚上9點為大家服務，同其他大快活分店一樣，每日提供多款精選早餐、茶餐，而午、晚餐時段，聽講亦會有招牌阿活咖喱同阿活焗豬扒飯等美食。另外，店舖入口會加設自助點餐機，電競區座位更設有「網上點餐」服務，只要3個步驟︰掃描座位上嘅QR code、網頁即時落單，再以電子付款方式結帳，就可以輕輕鬆鬆等美食送上，即時開戰。

此外，客人仲可以用手機應用程式「REES for Gamers」約戰平台，連上「大快活電競」高速Wi-Fi，即場參與場內定期舉行嘅電競比賽，同其他高手一決高下，仲有機會贏得豐富獎品，包括電競用品、豉油皇雞髀或者粒粒紅豆冰等！