【聲明】港生活網站並無進行電話推廣活動

坐昂坪360遊秘境 期間限定「Chill-cool花園」齊打卡

發佈時間: 2019/07/12

夏天出遊玩樂,當然不止與陽光玩遊戲啦。黛安知道,韓國人氣Instasia拍照館呢個暑假首度登陸香港,喺昂坪市集整咗5個期間限定嘅「Chill-cool花園」,集齊所有IG「仙氣」打卡背景,包括Chill Cool霓虹燈、文青女神圈、水簾仙境、萬花秘道和閨蜜花海,必定係呢個夏季「最Hot」景點。

公關姊妹話,拍照館由即日開始啟用,只要買昂坪360任何套票,或者喺昂坪市集內消費滿100蚊,就可以免費入場影相。不過要留意每日名額有限,而且每節限影20分鐘,入場前要諗定pose喇。

為咗方便學生哥一齊上昂坪打卡,由今日起至9月1號活動期間,25歲或以下的嘅本地全日制學生,只要親身出示身份證同學生證,就可以用半價買到昂坪纜車來回門票一張;以坐水晶車廂為例,門票價錢會由315蚊勁減到157.5蚊,啱晒成班朋友仔邊搭邊影靚相。

公關姊妹仲話,除咗拍照館,昂坪市集嘅圓形廣場仲布置成「Chill Cool花園」,有齊超巨型甜筒、糖果色雪條同馬卡龍甜點裝飾,影相一定「sweet爆」。

昂坪市集多幅外牆仲請嚟法國藝術家Elsa Jean de Dieu等人重新粉飾,用嚟打卡夠晒文青feel。同場亦有免費布偶劇及免費玻璃彩繪工作坊,布偶劇加入與小朋友互動環節,在玩樂中滲入環境保育的教育意義;而玻璃彩繪工作坊,就可以畀你親手製作一份充滿昂坪特色的紀念品,了解更多環保嘅重要性,姊妹們記住9月1日前要去了。

打卡展嘅終點係閨蜜花海,花園頂部鋪滿簇簇深深淺淺的紫色風信子,花束間垂吊晶瑩水晶球,充滿夢幻感。

撰文: 黛安 消息特靈八卦公關
欄名: 八卦名利場