【聲明】港生活網站並無進行電話推廣活動

海洋公園保育基金賣旗日 推廣珍惜生態愛護動物

發佈時間: 2019/07/15

黛安小時候都試過去賣旗,過程中可以訓練到膽量,仲可以做善事幫人,一舉兩得;最近就聽講香港海洋公園保育基金會喺下個月10號舉辦「港島區賣旗日」,希望招募4,000名賣旗義工,一齊為野生動物發聲!

聽公關姊妹講,賣旗日以「保育你實識一人一招救生態」做主題,係保育基金為鯨豚擱淺跟進、物種保育嘅科研項目與社區和公眾教育工作籌款,10款慈善旗紙分別配有設計獨特嘅野生動物插畫,主角都係喺香港出沒嘅野生動物,例如江豚、馬蹄蟹、香港瘰螈、歐亞水獺和穿山甲等。旗紙更配有行動貼士呼應主題,好似「減少使用即棄塑膠」、「唔好餵野生動物」、「欣賞濕地生物多樣性」等,非常貼地。

賣旗義工亦會透過旗紙,向大眾宣揚保育信息,仲可以同家人朋友一齊發揮創意,製作精美嘅「動物面譜」!

撰文: 黛安 消息特靈八卦公關
欄名: 八卦名利場