近日無綫新劇《十二傳說》以香港12個著名靈異事件為藍本，用懸疑推理形式調查奇案。呢套劇播出冇耐, 就帶起一股靈探熱潮。香港過去亦有發生過不少靈異事件, 你又知道嗎?
《碟仙碟仙》拍劇照驚見白影 演員突「變臉」露出恐怖表情
元朗達德學校前身係一間小學，喺1931年創校，至1998年停辦。該校喺二戰時期嗰陣，傳聞有村民喺抵抗日軍或英軍時被殺，屍體被葬於達德學校山邊，令該處變成亂葬崗，導致亡魂喺達德學校附近陰魂不散。另外，又有傳達德學校其中一任校長，喺校內嘅女廁穿著紅衣自殺，自此廁格經常出現紅衣女鬼身影，係校內鬧鬼傳言最盛傳嘅地方。到底呢件事係真, 定只係以訛傳訛? 直到目前為止仍無法證實。雖然冇辦法證實以上傳聞，但有藝人曾去過達德學校拍鬼片，仲親身遇過恐怖嘅靈異經歷...
(達德學校@TVB)
(達德學校@TVB)
藝人莊思敏（Jacquelin）同沈震軒（Sammy)喺2015年拍過一套名為《碟仙碟仙》嘅電影, 其中一幕講到佢哋玩「碟仙」，當時有位演員陸駿光喺拍攝中途突然又暈又嘔，仲話見到Sammy對住佢陰陰咀笑。但Sammy稱當時自己已經拍到好驚、好累，所以根本笑唔出，佢覺得係因為陸駿光太過入戲，先會產生幻覺。
(《碟仙碟仙》影片截圖)
(沈震軒@《碟仙碟仙》影片截圖)
(沈震軒@《碟仙碟仙》影片截圖)
除咗陸駿光喺拍戲期間遇到奇怪現象外, 莊思敏都對呢個拍攝場地有好強烈嘅感覺。佢話喺達德學校拍戲期間，禮堂係令佢感受最深嘅地方。Jacquelin本身對靈體好敏感, 如果有「朋友仔」喺佢附近, 會好易感覺到。Jacquelin當時入咗間學校3晚, 有兩晚都覺得非常頭痛，她說：「達德學校嘅室內設計本應好透風, 因為室內嘅窗都係對流窗式設計, 而且學校前面係空地, 後面係山, 室外環境都有風, 但就唔知點解入到學校內, 個環境就好似閂晒窗咁, 一啲風都吹唔到入去。 」這一切令佢大惑不解。
另外，喺拍戲期間, 有劇組同事幫幾個演員影劇照, 當時明明係影緊一張3個人嘅相, 但影咗出嚟卻見到有「第4個人」, 嚇到佢哋唔識反應。佢哋喺分享件事時形容, 嗰位「朋友」嘅外型係好似一團白霧咁, 樣貌好模糊, 好難睇得清楚。事後, 該劇組人員因怕得罪呢位靈體朋友, 佢唔敢刪除, 又唔敢分享畀人睇, 張相至今仲保存喺部相機到。
嚟緊無綫新劇《十二傳說》亦會去達德學校進行拍攝, 佢哋將會入學校拆解咁多年一直被傳有學生進入學校後, 被日軍鬼魂上身嘅傳聞, 到底最後佢哋又有冇辦法解開謎團呢?祝佢哋好運...
(莊思敏ig@jacquelinchng)
(莊思敏@《碟仙碟仙》影片截圖)
(莊思敏@《碟仙碟仙》影片截圖)
(《碟仙碟仙》影片截圖)
《幽靈人間》開拍前 怪事連環發生
長洲東堤小築係一個度假勝地, 同時亦係猛鬼勝地。事源喺1989年6月，一個35歲嘅失婚婦人，帶同仔仔到長洲東堤小築租度假屋，計畫謀殺及自殺。婦人當日身穿紅色唐裝衫褲，先殺死自己仔仔, 後再上吊自盡。自此, 東堤小築就開始流傳有紅衣女鬼出沒。喺香港經濟不景期間，有好多人都揀去東堤小築燒炭自殺，令東堤成為咗自殺勝地，鬼故不斷。雖然東堤猛鬼已經係眾所周知嘅事, 但仍然會有一啲拍電影嘅監製唔怕死, 去東堤到取景拍鬼片, 結果, 當日就發生多件唔尋常嘅事...
（網上圖片）
（網上圖片）
喺2001年, 一套由許鞍華導演監製嘅《幽靈人間》入面，有其中一日嘅外景拍攝係喺長洲進行。有份拍呢套戲嘅資深導演鄺文偉曾喺公開訪問時話, 佢當日到達現場時, 攞咗編劇部單車代步，當單車經過東堤一棟暗紅色磚屋嘅別墅時，突然刮起一陣陰風, 將佢連人帶車吹倒。佢話嗰陣陰風風勢唔強，但力量就大到可以將佢同部單車吹倒, 佢對眼仲差啲撞向別墅前嘅一個三角形磚到，幸好最後都只係手同腳擦傷咗。後來, 劇組人員諗住拎出藥箱幫佢處理傷口，但就搵咗半個鐘都搵唔到... 鄺導演話, 照道理劇組係必有藥箱嘅，突然唔見咗確係好唔尋常！然後, 劇組嘅人仲話, 當日啲香燒到某個位置就停咗，之後就燒極都燒唔著。鄺導演知道後, 立即叫佢哋馬上搵香同火機，結果, 全劇組有40幾個人, 最後只搵到一個火機。本來以為好好彩, 點知連唯一一個火機都係撻唔出火... 後來, 佢哋見到旁邊有個土地公，於是就開始口中念念有詞咁同土地公講：「對唔住，多多得罪，搵食啫，唔知騷擾咗你。」講完冇耐, 馬上就點得著香，上香後亦即刻搵到藥箱。鄺導演話，搵到藥箱後冇耐，佢終於明白係咩事... 鄺導演話:「原來我哋租用嘅化粧間，就係東堤小築入面鬧鬼最嚴重嘅嗰間屋，因劇組租屋時用《人間》呢個戲名登記，業主就唔知我哋係租嚟拍鬼片, 所以鬼神就會嚟騷擾我哋。」
《殭屍》導演到井字型猛鬼屋邨取景 片中拍到長髮鬼影
香港早期興建嘅屋邨傳出有靈異事件已司空見慣，其中一個就係被喻為最多人跳樓嘅井字型屋邨 — 坪石邨。相信大家對呢個有30幾年歷史嘅舊型屋邨一啲都唔陌生, 因為呢到出名多人跳樓自殺, 而且仲經常有傳好多住戶都撞過鬼... 最近, 有一位住坪石邨嘅網民稱, 佢都有喺坪石邨發生過一單疑似撞鬼嘅靈異經歷。該名網友話:「有晚大槪11點左右, 我行出電梯準備返屋企途中, 突然見到一個目測大概有190cm高嘅巨型黑影, 喺其中一角嘅尾房單位快速閃出, 然後就消失咗...基於探究嘅精神令我好想去嗰邊睇下咩事, 點知就發現尾房嗰個單位嘅住戶門口, 放咗一支白色大爉燭, 聽講點嗰種爉燭係因為屋企有親人離世, 所以用嚟招魂用。」
(坪石邨大廈井字型設計@《殭屍》預告片截圖)
(坪石邨大廈井字型設計@《殭屍》預告片截圖)
坪石邨嘅設計舊式, 感覺陰森又多鬼怪傳聞, 理應令人膽戰心驚。但呢個地方竟然因為咁而吸引到麥浚龍揀嚟取景, 開拍佢第一部執導嘅電影《殭屍》。當大家都好奇想知導演同演員喺拍攝當中, 有冇遇過靈異事件時，麥浚龍就話:「片中有拍到一個長髮鬼影，仲有剪喺電影中」。