【聲明】港生活網站並無進行電話推廣活動

聯合出版集團推300本新書 「知書」App提升讀書體驗

發佈時間: 2019/07/16

一年一度嘅書展聽日就開鑼啦!聯合出版集團噚日就宣布,今年書展會推出300本新書,黛安知道,聯合仲會推出全港首個集讀、聽、學、賞於一身嘅有聲閱讀App「知書」,有30,000本電子書陸續上綫!

「知書」入面有5大範疇,分別係「講書」、「開課」、「有聲書」、「電子書」同埋「視頻」,為讀者帶來全新嘅閱讀體驗,用耳仔就可「聽書」。

今日公布嘅20本新書中,黛安印象最深嘅有3本,包括資深動畫人盧子英嘅《動漫摘星錄》,有逾700張珍貴圖片,仲有紀錄佢喺40幾年來跟不同國際知名動畫大師,包括漫畫家手塚治虫、《反斗奇兵》導演John Lasseter同動畫大師宮崎駿等等嘅交流經驗。盧子英想藉住著作,鼓勵其他醉心動畫創作嘅人堅持夢想。

第二本想推介就係「招牌佬」李健明嘅《你看港街招牌》,書入面會帶大家欣賞唔同種類、顏色同地區嘅招牌,仲欣賞港式招牌嘅美學。

最後一本成功吸引黛安眼球嘅係一本關於太空嘅兒童立體書《漫遊太空立體書》,可幫助小朋友理解難明嘅科學概念,好似用轉動解釋月球受光、特大拉尺顯示八大行星距離等。

公關姊妹仲話,書展期間三聯書店、中華書局同商務印書館將推出會員迎新計劃,只要單次消費滿港幣300元就可成為會員,全年都有9折優惠㗎,記住唔好錯過呀!

撰文: 黛安 消息特靈八卦公關
欄名: 八卦名利場