劇集《好日子》入面，王綺琴飾演的齊瑂跟父親齊億章（李國麟飾）慢慢修補父女關係，感動人心。現實生活中，綺琴是一子之母，她雖然是職業女性，但堅持自己帶大囝囝，餵奶、換片、帶返學校都親力親為。王綺琴接受《晴報》專訪，直言雖然39歲才趕「尾班車」生下囝囝，但作為母親已付出百分之一百零一的努力，「我深信我點都有80分。」
一click即睇：
王綺琴直言自小就鍾意小朋友，但太鍾意又會擔心自己的能力，是否能夠將最好的都交畀小朋友，結果愈拖愈耐，直至39歲在朋友的提醒下，不想留有遺憾，才追上「尾班車」生下囝囝，至今已經16歲了。她笑言：「人生係一個循環，我當年好反叛，所以我都知有可能生一個好反叛嘅小朋友，幸好我個仔暫時都好乖，但總會有激氣同令我嬲嘅時候，咁我就完全感受到當年我激到自己媽媽好傷，不過後悔同遺憾都補救唔返，因為父母已經離開。」作為一個在職媽媽，王綺琴直言已付出百分之一百零一的努力，她說：「相信所有父母都一樣，但我個仔係咪認同呢？又未必，但我深信我點都有80分。」
王綺琴在劇集的演出備受讚賞。（《晴報》圖片）
王綺琴對自己當媽媽的分數有一份信心，全因為自己經歷過生死的一刻，擔心自己性命不保的時候，她卻率先為囝囝安排一切。王綺琴前年在飛機上暈倒，接受檢查後發現腦裡有個血管動脈瘤，她說：「好幸運，我成世人冇坐過商務客位，咁啱嗰次有贊助去泰國旅行，好開心，回程期間我面前一黑休克，當空姐拍醒我嘅時候，我已經感覺到自己條褲濕晒，原來我休克之餘仲失禁，所以落機之後就立即睇醫生，我以為係血壓低冇事。」沒想到，醫生在她的腦入面發現血管中有腦動脈瘤，要立即接受手術處理，否則影響視力、神經，也難保有一刻會突然爆開中風，導致半身不遂甚至死亡。
綺琴憶起當時的情景，她都不忍落淚：「我其實好震驚，當時第一刻就想起我個仔，個仔年紀仲係細，如果一個小朋友失去媽媽係一件好慘嘅事。如果有事，咁我個仔點算呢？佢一向好依賴我，所以我已經作出最壞打算，即刻去安排晒個仔以後嘅生活。生活方面，我的家人一定會照顧佢，但情緒上冇辦法，所以我要諗定，我寫定一份遺囑同一封信交代我身後事。」手術前，綺琴慢慢用輕鬆的方式向囝囝講述自己的身體情況，解釋只是小手術，但直到入手術室前的一刻，綺琴實在難掩心中的驚恐，在囝囝面前淚崩，她說：「入手術室之前嘅一剎那，我真係唔知自己返唔返到出嚟，如果返唔到出黎呢，咁就會係見我個仔最後一面，諗到咁我就狂飆眼淚，反而個仔安慰我：『媽咪冇事嘅，你一定會返出嚟！』」
提到患病的經過，綺琴不禁激動落淚。（《晴報》圖片）
囝囝一向依賴媽咪，在生病的過程中，綺琴難免最記掛的就係囝囝（圖片：受訪者提供）
綺琴為怕家人擔心，將自己的擔憂和恐懼都藏在心裡，她說：「我覺得死亡好容易，辛苦係留喺度嘅人，我唔想表現到自己好驚，我反而笑笑口叫佢哋記得買定嘢食畀我食。令身邊嘅人擔驚受怕係無補於事，喊苦喊忽又多意見，其實都冇用，所以我自己處理呢個病情，我自問會畀99分自己。好感恩，醫生同醫療團隊都好好，我可以繼續享受往後嘅日子。」
在死門關前再次重獲新生，綺琴對生命有不一樣的看法，她說：「我在手術後蘇醒之後，我雙手合十放在心口，好感恩，往後嘅日子對我而言都係格外嘅恩賜，生死其實只是一剎那之間，我幾乎失去過。生命其實係冇第二次，你唔珍惜冇人幫到你，做人開心又一日，唔開心又一日，唔好認為人哋有錢就無憂，好多人餐餐大魚大肉都唔滿足。好好睇睇自己處身咩環境，開心係自己畀自己，做人每一日都遇到唔開心嘅事，好快就過，第日太陽升起又另一日，唔需要帶住咁多負面情緒生活。人嚟嘅時候兩手空空，走嘅時候兩袖清風，好多事情都應該釋懷放下。」
王綺琴透過運動保持身體健康。（《晴報》圖片）
由於血壓偏低，玩空中瑜伽能夠加強她的血液循環。（《晴報》圖片）
康復後的綺琴經常做運動保持身體健康，太極、空中瑜伽、行山等等，特別是她經常血壓低，所以她利用空中瑜伽的動作，讓血液運行得更加好。她認為做運動跟人生一樣，綺琴說：「有次我跟朋友上雪山，從高處望落去，我真係好驚，好驚唔知點落返去，識滑雪嘅人都知道最重要係學識剎停，但我剎停技巧仲係麻麻。當時，我驚到坐喺雪地上面喊，其實過程中冇人可以幫到你，幫到你只有你自己，只要唔好衝動，慢慢去搵到自己個方法走落去。就好似玩任何運動，就算做空中瑜伽，你企上繩索上面，冇人可以幫到你，停一停諗一諗，用自己清醒頭腦思考，就可以慢慢搵到個動作嘅技巧。」
在滑雪的過程中，令王綺琴對人生有另一番的領悟。（圖片：受訪者提供）
王綺琴在運動向方面都周身刀。（圖片：受訪者提供）
康復後的她認為生命冇第二次，自己會不停做運動去保持健康。（圖片：受訪者提供）
綺琴不時相約圈中好友一齊行山，圖中還有黑妹和尹揚明等。（圖片：受訪者提供）
場地提供：iDanceHK