《愛.回家之開心速遞》昨晚一集講到Terry(李偉健 飾)復出拍戲, 引起大龍生（羅樂林 飾）不滿, 於是大小姐(林淑敏 飾)用盡方法禁止Terry去拍戲。二太太（蘇恩磁 飾）同三太太(樊亦敏 飾)搵咗行政人員Andy(崔錦棠 飾)設局虛構一個Terry粉絲, 再寫信比Terry讚佢好演技, 呃佢繼續拍戲，令佢喺龍家失勢，天真無邪嘅Terry結果落入Andy嘅陷阱之中。戲中蠱惑又縮骨嘅Andy, 到底喺現實當中又係點樣嘅人呢? 原來佢除咗係體育節目主持之外，仲曾經代表過香港出戰三鐵「亞洲錦標賽」, 仲得到唔錯嘅成績！
Andy詭計被拆穿，Terry傷心不已。(圖片：《愛回家之開心速遞》電視截圖)
大小姐叫Andy現身，向Terry講清楚扮影迷寫信一事。(圖片：《愛回家之開心速遞》電視截圖)
(崔錦棠ig@tony_chui)
(《晴報》圖片)
崔錦棠入行前 原來係體育界運動健將？
崔錦棠，人稱「棠哥」，現年50歲，入娛樂圈之前，曾經係香港三項鐵人代表隊嘅成員，1996年退役後，棠哥先後在幾家電視台擔任足球評述員和體育節目主持，直至2015年開始，佢加入無綫成為合約藝員，參與多個劇集演出。棠哥初期喺無綫，多數都係演出公職人員或正氣嘅角色，後來加入咗《愛回家》，就開始嘗試演出縮骨嘅行政人員角色，角色性格鮮明，特別是跟Peter（杜大偉飾）同Ivan（鄧永健飾）三個經常做花生友，令人留下深刻印象。
崔錦棠讀中學時非常熱愛運動，足球、跑步、游水等等，曾經喺校內嘅水運會奪得男子丙組50米背泳金牌，86年他加入南華田徑隊，主項3千米障礙賽，其最佳嘅成績係10分10秒；1500米4分18秒；800米2分4秒等。喺88年嘅時候，棠哥為咗想挑戰自己，於是去咗參加「全港青少年三項鐵人錦標賽」，結果奪得亞軍！直到89年，棠哥再代表香港出賽，92-96年間連續 5 年代表香港出戰「亞洲錦標賽」，最好成績係得到隊際賽銀牌及個人最高亞洲排名第七位，而且仲曾喺多個亞洲地區賽事打入三甲！
(崔錦棠ig@tony_chui)
進軍娛圈後 仍不減對體育嘅熱情
最近, 崔錦棠喺個人社交平台到分享咗有關佢呢個月喺新加坡參加嘅田徑錦標賽活動照片, 佢仲撰文向粉絲公布喜訊話:「一起步放膽衝，一直領先到最後一個欄，可惜心急+力量下降...碰欄，導致速度減慢，被東道主Jason 趕過，以0.07秒飲恨，屈居亞軍。多謝隊友拼盡，總算4x100 & 4x400 有金牌落袋。」雖然棠哥現年已經有50歲，但佢仍然可以保持咁強健嘅體魄奪得金牌，到底佢有咩健體嘅秘訣呢？崔錦棠接受《晴報》電話訪問時話：「呢幾年我再復出參加田徑比賽，先進組，係35歲以上組別，以往我一直都有做教練工作，跑步、游水同單車，因為自己玩過三項鐵人，我依家都繼續上緊堂，希望考取田徑教練牌，其實下月我會開新劇，劇入面監製搵我演田徑教練，真係好開心，做返自己專業。」他直言為興趣，朝早拍劇，夜晚練田徑，當然比別人辛苦，但自己鍾意就會好投入去做。
(崔錦棠ig@tony_chui)
棠哥表示在《愛回家》入面跟杜大偉和鄧永健一齊演威龍花生友，他們拍攝時雖然對白和戲份都不多，但三人私下都會一齊去度動作或者表情，希望短短時間可以為觀眾留下深刻印象，他說：「雖然戲份唔多，不過真係多謝《愛回家》，劇集入屋，令我哋都多人認識，我講廿幾年波嘅人氣都不及我入《愛回家》劇組三個月。起初我係大小姐（林淑敏飾）嘅手下，專畀錢我去拆散秦博思（馬貫東飾）同林美香（謝㺭圻飾），後來演變到無論邊一房有需要，只要有著數呢，我就會幫手。面對大小姐強勢，我都設計咗小動作，次次都90度鞠躬咁走，希望觀眾睇得到。 」運動與拍劇，棠哥表示自己有家庭負擔，太太是家庭主婦，照顧兩個仍在讀書的兒子，一家擔子都在自己身上，所以要努力搵錢，他說：「之前一心係做體育組編輯同主持，但後來體育組規模愈來愈細，我就轉做演員，好開心入到《愛回家》，後來有其他監製都合作得好好，一直都有劇集，嚟緊《十二傳說》有一個單元都有我，算係自己幾多戲份嘅一個角色。」棠哥都希望《愛回家》入面可以有更豐富的劇情發展。