手機影相APP愈出愈厲害，美圖、美肌、瘦面已是等閒事，最近更演化成時光機一樣，之前有變童顏APP，個個明星都爭住玩，希望自己變番細路，呢兩日又有新APP，今次玩變老，而且感覺好像真，好似睇到自己未來一樣。洪永城同黃翠如率先試玩，兩個人容貌變化不大，算「合理」範圍，不過不少網友都指翠如變老之後好似吳業坤媽媽，連龔嘉欣都話似。其實坤哥媽媽開Instagram後，不時上載年輕時的照片，網友都異口同聲讚她後生似足黃翠如，非常有氣質，大家又覺得似唔似呢？
黃翠如上載二人的變老相，如果可以合作到呢個年紀，就真係非常唔錯！（圖片：黃翠如IG）
睇圖都知道洪永城真係好愛護黃翠如，佢只係POST自己個老樣，黃翠如係靚靚童顏嚟呀！(圖片：洪永城IG）
吳業坤媽媽經常被讚似「福氣版」黃翠如。(圖片：吳業坤IG）
望落又真係幾似。(圖片：吳業坤媽媽IG)
左手邊係黃翠如媽媽年輕時的樣子，大家覺得似唔似？（圖片：吳業坤媽媽IG)
其實洪永城同黃翠如一向老友鬼鬼，由有線電視年代，已經合作旅遊節目，直至雙雙去無綫發展，在節目中繼續狗咬狗骨，火花不斷，反而獲網友非常受落，更有不少潮文寫到「有一種感情叫洪永城黃翠如」、「每個男人心中都有一個黃翠如」等等，雖然最終兩個冤家未能成對，翠如下嫁給蕭正楠，不過身為老友的洪永城都有飛到峇里出席他們的婚禮，送上最衷心的祝福。洪永城和黃翠如快將再度合作旅遊節目，不少觀眾都大感期待，他們用今次變老App互嘲，洪永城說：「其實我希望有一個後生啲嘅同我一齊去旅行。不過命運總有佢嘅意思。諗真下去到咁大年紀仲要見到你 #旅程就係一個修練 #澳洲旅遊之旅十月見」而黃翠如剛留言說：「洪永城，都一把年紀啦，真係仲要再合作互相虐待？諗清楚先啦！#合作定唔再合作」
洪永城和黃翠如是旅遊節目的最佳拍檔。（圖片：黃翠如IG)
除了洪永城和黃翠如外，陳柏宇將囡囡Abigail變老，認真冇陰公，而林奕匡上載幾張「變老」表演相，並留言說：「如果我三四十年後還可以為大家表演，甚麼都值得！」而林師傑用他跟歐陽巧瑩的結婚相「變老」，更發表愛的宣言：「30年後娶多你一次。」認真冧冧豬！
陳柏宇竟然惡搞自己1歲都未夠嘅女，認真曳曳！（圖片：Abigail IG )
林奕匡希望到老都可以繼續為大家表演。(圖片：林奕匡IG）
林師傑揚言想30年後再娶太太歐陽巧瑩多一次，認真冧豬。（圖片：林師傑IG )