上海尋得好味粵菜

我今次喺上海，竟然畀我食到好好味嘅粵菜。餐廳名「喜悅8號」，食得喜悅，發囉！你可能質疑，食得喜悅，同發有乜關係？用最便宜價錢食米芝連二星餐廳食物，你仲唔發？

廣東菜要食燒味。先嚟斬嚿大叉燒，放入囗，又厚又軟又冧又入味，原來是用豬肩膀上只有兩條的梅肉做。用料嚴謹，遲咗必定賣晒。唔緊要，食唔到叉燒，食選用新鮮五花腩做的燒肉，肥肉切走，用最好部分來整，薯片咁脆嘅皮，涼咗放入口，依然咬到脆卜卜，咁神奇？原來個皮酥脆的秘訣是分兩次烤。第一次用大火烤25分鐘，將皮烤到焦，刮去焦皮；第二次以小火烤，將油逼出來，皮才會酥脆，非常有心有力。

跟着出場的燒鵝，除了皮脆肉嫩，兼且不油膩外，還有兩種食法。第一是好似食片皮鴨咁，將脆鵝皮放在荷葉餅上，拼埋蔥段、鮮菠蘿切條及醬枓，捲埋放入口。第二種食法，是將鵝片放在蝦片上，再加些秘製芝麻醬，啲鵝味混埋醬味滲落蝦片，咔擦一聲，百般滋味在口裏。一啖又一啖，一塊接一塊，停唔到手同口，點算？前菜都未食完，咁食法已經飽，好彩跟住上咗個用東南亞醬汁整嘅起骨豬手，媽呀！有甜酸，無苦辣，仲帶唔同層次嘅東南亞風味，夏天食，勁開胃，死未？

跟着上嘅係蝦餃。晚飯上蝦餃？有無搞錯？原來內地興晚上吃點心。每粒蝦餃包入兩種爽口的越南虎蝦和新鮮活蝦，透視在通透的皮下，我又受不住誘惑了。剩係前菜都講咗500字，仲有主菜同甜品，每一味都食得出係用心製作。

最值得讚嘅係老闆們，不以盈利為唯一目的，這份真誠果真令人食得喜悅！同「米」唔同命，通常香港業主得知商家獲得米芝蓮後，都會大幅加租，之前香港數家平民食肆亦因此被加租、被逼遷同結業，而上海這一間卻好好彩，完全沒有上述的問題。

（本欄逢周四刊登）