【聲明】港生活網站並無進行電話推廣活動

慶祝蝙蝠俠80周年 黑夜騎士現身半島酒店

發佈時間: 2019/07/19

喺黑夜中投射到空中嘅蝙蝠圖案,即將請來超級英雄現身香港!適逢蝙蝠俠面世80周年,黛安收到風,香港半島酒店準備喺9月21日大搞「蝙蝠俠日」慶祝,公關姊妹話當晚8點到午夜12點,會喺酒店外牆投射經典蝙蝠標誌,啱晒影迷喺酒店前打卡,見證夢幻時刻。

香港華納兄弟消費品常務董事Bianca Lee都話,非常期待今次嘅80周年活動,希望本地同全球嘅蝙蝠俠迷可以「共同喝采慶賀」。

半島酒店集團地區副總裁兼香港半島酒店及上海半島酒店常務董事張榮耀都話︰「2007年《蝙蝠俠—黑夜之神》來港取景時,香港半島酒店都係其中一個拍攝場景,酒店同仁都非常期待參與今次嘅全球慶祝活動。」

當日西九文化區苗圃公園仲會舉行「蝙蝠俠晚間夜跑」活動,參加者可着上以蝙蝠俠、小丑、小丑女等經典角色為主題嘅跑衣上陣,完成全長4.3公里嘅「正邪之戰」大賽。大會仲會附送特別設計嘅蝙蝠俠夜光上衣,幾時想做「黑夜騎士」都得啦。大會話今次夜跑不設年齡限制,預計可以吸引到6,000至8,000人參加。

公關姊妹仲預告,未來喺某黃金地段商場會連續搞兩個月活動,慶祝蝙蝠俠面世80周年。不過依家要先賣個關子,大家要同黛安一齊留意最新消息喇!

蝙蝠俠夜光上衣

撰文: 黛安 消息特靈八卦公關
欄名: 八卦名利場