主持《流行經典50年》 胡楓擔心請唔晒嘉賓

胡楓（修哥）昨日出席《流行經典50年》記者會，他將於下月3日起正式接棒做主持，暫定主持13集。提到修哥在圈中人緣甚廣，他講笑一集最多只能邀請三、四位嘉賓，擔心請不完圈中好友。

胡楓昨日孖陳敏之、鄭俊弘及譚嘉儀出席記招，四人將齊齊主持《流行經典50年》。修哥表示如果表現好，可能會添食，問他只主持13集的話，豈非不夠集數邀請各方友好做嘉賓？他笑說︰「係啊！一集得三、四個嘉賓，請唔晒！」

商天娥拍劇睇緣份

問修哥會否邀請圈中的契仔、契女做嘉賓？他笑說︰「睇下佢哋想唔想，暫時我未發過邀請，嘉賓由公司負責啦，我做好主持、唱歌工作，其他咩都唔理。」他透露錄影時必定會唱飲歌《百花亭之戀》，屆時希望全場大合唱。

除了四位主持外，昨日約50位不同年代的歌手，包括商天娥（娥姐）、麥潔文、葉振棠及王灝兒（JW）等齊齊撑場。商天娥指《流行經典50年》是繼《歡樂今宵》之後，無綫另一長壽節目，她得知修哥做主持後，立即答應做嘉賓。

工作方面，娥姐表示最近忙於綵排舞台劇《謀殺啟事》，問她會否重返無綫拍劇？她說︰「依家每逢一、兩年就演舞台劇，叫做過咗癮。拍劇睇緣份，因為我好大汗，如果出外景好辛苦，粧都溶晒。」另外，同場的JW表示自己從小聽英文歌長大，希望在節目中多唱英文金曲，又謂在節目中與不少前輩合作，令她獲益良多。

撰文︰Pauline

編輯︰李潔盈

美術︰梁政敏