【聲明】港生活網站並無進行電話推廣活動

六本木人氣餐廳 登陸香港山頂

發佈時間: 2019/07/23

山頂廣場大翻新雖未正式完工,但已有新餐廳進駐。37 Steakhouse & Bar總店設在東京六本木,上海亦有分店,兩間姐妹店均有靚景伴食,香港代表當然唔輸蝕,選址山頂就知,飽覽港島、九龍區靚景,居高臨下鋸扒好吸引。

叫得做「Steakhouse」,牛魔王們有很多選擇,日本、美國、澳洲、韓國,坊間少見的比利時牛扒也有供應。首推日本A5級黑毛和牛,由日本老字號、頂級肉類供應商「日山」供應,大廚特地選來3個部位,包括油份少、軟腍的板腱肉,油香肉味兼備的肩胛肉,富油香、肉味濃的臀肉。各有優點,由食客自選心水。

西班牙靚爐烤扒

餐廳用西班牙靚爐Josper烤扒,其密封式設計,熱力不易流失,保持高溫烹調,既以烤的烹調方式,亦有如焗爐的效果。混合日本備長炭及越南炭,能將和牛烤得外皮微焦,內裏juicy,更有陣炭香味。別忘蘸點自家調的凍黑椒汁食,用清酒、味醂、醬油、黑白胡椒、乾紅辣椒及日本麻醬等調味,辛香、層次豐富,能帶起肉味及解膩。

想來點特別牛扒,一定要揀比利時貨,大廚讚它質感柔軟、肉味適中,供應的西冷扒更經過15日乾式熟成,烹調後肉味更濃。別以為牛扒同紅酒先係perfect match,清酒一樣得!這裏有多款日本「松本酒造」澤屋松本系列清酒,品牌在香港少見,一場來到,記得試試靚酒靚牛結合的奇妙效果。

37 Steakhouse & Bar

地址︰山頂山頂道118號山頂廣場1樓102-103號舖

電話︰2885 3320

營業時間︰11:30am-3pm、6:30pm-11pm

平均消費︰$800

備註︰酒類將於稍後供應

編輯︰余運慶

美術︰招潤洪

黑松露薯蓉配慢煮雞蛋 $108︰慢煮日本蛋混合黑松露片、自家製薯蓉,拌勻吃yummy。

三式新鮮生蠔三食 $158︰今期有時令西班牙生蠔Arousa,海水味濃,爽脆,3款分別配以乾蔥油醋醬、羅望子汁、木魚花啫喱及魚子醬,食出不同滋味。

手切牛肉他他配荷蘭汁 $198︰以日山和牛混合美國靚牛而成,集合兩牛優點。手切牛肉特別有咬口,肉味、油香更愈食愈出,鋪面有荷蘭汁,亦可跟意大利魚子醬、酸青瓜及乾蔥粒同食。

意大利紅蝦薄片 $198︰1客約用上3隻西西里紅蝦,鮮甜爽滑的紅蝦片,伴以龍蝦殼、紅蝦殼及乾蔥的油醋汁。

餐廳由日本大師森田恭通設計,環境有格調,木飾配綠色調,看得舒服。